Shillong, Rymphang 15: U Lat ka Jylla Phagu Chauhan ha ka sngi Thohdieng ula ong ba ka Sorkar Jylla kala shim ia ki sienjam ban pynthikna ba ka jingtih dewiong da ka jingstad saian kan sdang noh shen hapoh ka Jylla.
Haba ai jingkren ha ka sngi sdang jong ka Dorbar Mang tyngka, u Chauhan ula iathuh ba ka Ministry of Coal, ka Sorkar India kala mynjur ia 17 tylli ki application ban ai ia ki prospecting licence.
Napdeng kine ki 17 tylli ki application, 6 ngut ki nongapplai kila aiti ia ka geological report sha ka Sorkar Pdeng bad kila ioh ia ka jingmynjur.
Ula ong, ka mining plan jong ki 4 ngut ki nongaplai ruh la dep ban ai jingmynjur mynta da ka Ministry of Coal bad kine ki 4 ngut ki dang ap ban ioh sa ia ka environmental clearance.
“Da kine kiei kiei baroh, la khmih lynti ba ka jingtih dewiong da ki kor ki bor ka saian, kan sa sdang noh shen ha Jylla” ong u Lat.
