Guwahati, Jymmang 14: Ki Pulit ka Assam kila ioh ban kem ia arngut ki lehnoh na ka kynhun Lehnoh ka Bangladesh kaba don jingiadei bad ka Al Qaeda hynnin ka miet sngi Nyngkong na Railway Station,Guwahati.
Kine ki arngut ki kyrteng u Bihar Mia ba 30 snem bad u Rarely Mia ba 40 snem.
Hadien ka jingioh ia ka khubor syntiat ba thikna ba don arngut ki suba lehnoh ka kynhun Ansurallah Bangla Team (ABT) kaba don jingiadei bad iajan bha bad ka Al Qaeda ha Ri India, ki Pulit kila pynlong ia ka jingkhynra bad iohkem ia ki na Guwahati Railway Station.
Kine ki arngut ki lehnoh Bangladeh kila sah beain ha India khlem ka passport ne khlem kino kino ki kot ki sla bad kila wan ban leh ia ki kam pyntriem ha Assam bad India baroh kawei. Na kine ki briew la ioh ruh ban kurup ia ka Aadhar ka Ri India bad ka Pan Card ba shu shna thok.
La iathuh ba kine ki arngut kila wan rung sha Guwahati da ka jingthmu ban pynrung dkhot ia ki samla Muslim ka Assam bad na kylleng ka Ri India ba kin iasoh bad ka kynhun na ka bynta ban leh ia ki kam pyntriem.
Ia kine ki briew la register case hapoh ka kyndon 120(B)/121/122/468/471 IPC R/W section 10/13 UA(P) Act, kyndon 12 jong ka Passport Entry To India Act, 1920 bad kyndon 14 jong ka Foreigners Act, 1946.
