Guwahati, Jymmang 16: Haba shim ia ka sienjam ba kongsan ban iakhun pyrshah ia ka kam khaii briew ban pyniaid sha ki kam awria bad ban pynduh jait ia ki kam ai ksuid, ka sorkar Assam kala pynmih ia kawei ka policy ba thymmai ia kaba la ai kyrteng ‘Assam policy for combating human trafficking and end witch-hunting’.
Kane ka sienjam ba la shim da ka sorkar, ka long ban weng ia kine ki jingeh kiba khraw kaba mih ha ka imlang sahlang bad kaba la pynjynjar ia ka jylla, ha kaba da ki spah ngut ki briew kila shah pynshitom ne shah pyniap ha Assam da ki phew snem kaba la paw pyrthei ia ka jingleh ki nongai ksuid.
Kane ka policy, da ka jingthmu ban pynsngewthuh paidbah kumjuh ruh ban pynkhlain ia ki bor jong ka ain bad kumjuh ruh ban kyntiew iaka jingiatrei lang hapdeng ki paidbah ban weng ia kane ka jingkhaii briew bad ruh ia ka jingleh ksuid.
Lyngba ka jingthaw ia ka rukom treikam na ka bynta ban iada bad ban iarap ia ki lanot kiba shah ktah, ka sorkar Assam ka kyrmen ban seng ia ka kynhun kaba khlain ban pynbeit halor kane ka jingeh.
Ia kane ka Policy yn pyntrei kam da ka tnad Women and Child Development Department.
Lyngba jong kane, ka sorkar Assam ka thmu ban iada na kum kine ki kam runar kaba la ktah ia ka imlang ka sahlang bad kumjuh ruh ban pynbiang ia ka jaka ba shngain ia ki nong shong shnong bad ruh ban pyntikna ban kyrshan ia ki lanot.
Halor kane ka sorkar ka sngew donkam kyrkieh ban don ki lad jingiarap na ka bynta ki jaka ba shngain ia ki kynthei bad ki khynnah kiba bun sien ki kylla langknia bad ngat ha kum kane ka apot sep sngi.
Ka jingthmu jong kane ka policy ka long ban wanrah ka jingpyn sngewthuh paidbah bad ruh ban don ki ain ba khlain bor bad ruh ban don ka jingiatrei lang hapdeng ki paidbah nong shong shnong ban weng ia kine ki jingeh ba ju ia kynduh.
Ka Assam kala pass ia ka Assam Witch Hunting (Prohibition, Prevention and Protection) Act, 2015 ban weng ia ka jingai bad ki kam men ai ksuid hapoh ka jylla
