Guwahati, Risaw 15 : Ka Gauhati Medical College & Hospital (GMCH) kala ujor ia ka ejahar pyrshah ia arngut ki briew kiba la ithuh kum ki snar khaii snam ha ka sngi nyngong, kaba pyni ia ka jingdon ka kynhun ki nongpyniaid iew ia ka snam hapoh ka hospital.
Ia kane ka ejahar la ujor ha Bhangagarh Police Station hadien ba u nongpahara jong ka GMCH ula ioh kem ia kine ki arngut kiba kyrteng u Tilak Borah bad u Lal Bahadur Shikh.
Ha ka jingtohkit la shem ba u Borah u dei uba don ia ka jingpang HIV positive. Une u briew ula kubur ba ula ai snam tang shisien hashuwa kane ka jingshah kem bad ioh pdiang ia ka song pisa ba T.2000 kum ka bai snam.
Ki doktor ka GMCH kila batai ba ka snam bala ai da u Borah hashuwa kane ka jingjia, lehse la pdiang ia ka namar ba u khniang u khlem paw satia ha ka snam jong u ha katei ka por.
“Ngi ju leh ia bun ki test kynthup ka malaria bad hepatitis hashuwa ban pdiang ia ka snam na ki nongai snam. Naba la shem ba une u briew u don ia u khniang HIV positive mynta ka sngi, ka mut ba ka snam bala ula dep ai teng kam shym la pyni ia ka jingdon u khniang” kila batai.
Ki Pulit kila register case halor kane ka jingjia bad ka jingtohkit kala iaid shakhmat ban kyndang ia ka kynhun ki nongkhaii snam hapoh kane ka jaka sumar.
