Guwahati, Naitung 19: Ka jingtwa khyndew kaba jur bha, ka la jia ha Kharguli ha Guwahati, ha ka step Sngi U Blei, ha kaba la pynpra ym duna ia ka hynriew tylli ki scooter, bad tap hapoh khyndew bad ki jakhlia.Ym shym la don kano kano ka jingduh ia ki mynsiem briew ne jingmynsaw, la iathuh ki heh ophisar.
Kane ka jingjia ka la jia hadien ba u slap ba khlem sangeh u la ther ïa ka nongbah ha kine ki lai ne saw sngi ba la dep, kaba la pynlong ïa ka jingshlei um kaba jur bha ha ki katto katne ki bynta jong ka Guwahati. Da ka jingjur jong u slap, ka jingtwa khyndew ka dang long ka jingma kaba khraw ha ki jaka lum jong ka nongbah watla la pynmih bunsien ïa ki jingpynbna da ka India Meteorological Department (IMD).
Ki kynhun na ka State Disaster Response Force (SDRF) bad ka National Disaster Response Force (NDRF) ki la leit sha katei ka jaka bad ki la sdang ïa ka jingpyllait im bad pynkhuid, da kaba weng ïa ki jakhlia bad sei ïa ki kali ar shaka kiba la shah pynjulor.
Hynrei ki nongshong shnong ki la kynnoh kham palat ban ia ka jingslap. “Ngi la maham bunsien ia u trai jaka ban nym pynlong ia ka jingtei ha ka lum ha ka por lyiur, hynrei ia ki jingmaham jong ngi ym shym la sngap,” la kynnoh u nongshong shnong u Shankar Talukdar. U la kynnoh ba ka jingtei kaba dang ïaid shakhmat bad ka jingtwa jong kawei ka kynroh ba pynsah ka la pynlong ïa ka jingtwa khyndew bad u la kyntu ïa ki bor pyniaid district bad ki bor jong ka disaster management authorities ban khanglad mardor ïa ki jingtei kiba don hajan, da kaba maham ba ka lum ruh da dang shong synjor.
Daba khot ia ka kum ka jinglait salit, u heh jong ka Guwahati Municipal Corporation (GMC) u Junmoni Deka u la ong ba ka long kaba donbok ba ym shym la don mano mano ruh kiba la shah rong noh. “Dei ban kiar na ka jingtei ha ki jaka lum kiba lah ban shah ktah ha ka por lyiur.Ki heh na ka bor pyniaid district, ka Disaster Management Authority bad ka ophis jong u Deputy Commissioner ki dang bishar bniah ia ka jinglong jingman. Yn shim ia ki sienjam kiba biang hadien ba la tip ia ka daw bad pynbeit ia ka jingkitkhlieh,” ka la ong.
U Bishnu Shah, uba ka scooter jong u, ka la shah pynjot na ka jingtwa khyndew, u la pan jingiarap pisa, da kaba kynnoh ba ym shym la shim ia ki lad jingiada kiba biang watla la ju maham bunsien halor ka jingtei kaba dang iaid shakhmat.
Katba ki jingpynkhuid ki dang iaid shakhmat, ka jingkhuslai ka mih ia ki para marjan.Ki bor pyniaid ki dang buddien bha ia utei ka lum hapdeng ka jingtieng ba ka jingjur shuh shuh jong u slap ka lah ban pynmih ia ki jingtwa khyndew kaba thymmai.
