Guwahati, Rymphang 08 : U Myntri Rangbah ka Assam Himanta Biswa Sarma ula pynbna ba ka Sorkar Assam kan sa shong bishar ia ka Bill jong ka Uttarakhand halor ka Uniform Civil Code (UCC).
U Himanta ula pynpaw ruh ba ka Sorkar ka lah ban rai pyntreikam lang ia kane ka Bill hynrei kan wanrah pat ia katto katne ki jingkylla bad jingpynryng thymmai ia ki kyndon ki ban long kat kum ka jingdonkam hapoh ka Jylla.
Ka Iingdorbar Thaw Ain ka Uttarakhand ha ka sngi Balang kala mynjur ia ka Uniform Civil Code (UCC) Bill da ka voice vote hadien ka jingiatai kaba neh haduh arsngi.
Kane kala pynlong ruh ia ka Uttarakhand ban long ka Jylla ba nyngkong eh hapoh ka Ri ban don ia ka UCC, kaba kynthup lang ia ka ain halor ka jingkyntiew kurim, jingiapyllait san shyieng, ka jinghiar pateng bad kiwei kiwei.
Hynrei kane ka Jylla kala buh pat ia ka kyndon ba ka UCC kan ym treikam satia ia ki jaidbynriew kiba dang hap hapoh ka Scheduled Tribe (ST).
Kat kum kane ka bill, la pynlong kongsan ban register noh ia ka kam iasahlang ki shijur (live-in partner) bad ki bor District lem kumta kin ngat ha ka jingpynsajia da kaba shong along haduh 6 bnai lem bad ka kunba ba T.25 hajar.
Kane ka kyndon kala pynmih ia ka jingiatai kaba thnem bha khamtam ha Assam kaba thmu ban shim lang ia kane ka bill ban pyntreikam hapoh ka Jylla.
