Guwahati, Nailar 25: Haba kynthoh bad takrain tyngeh ia ka jingkren ka Syeda Hameed ba dang shen, U Myntri Rangbah ka jylla Assam Himanta Biswa Sarma haba kren ha Kokrajhar ha ka sngi Nyngkong, u la ong ba ka Congress bad ki paralok jong ka, ki dei kiba pynshlur ïa ka jingwan buhai shnong be-aiñ ki poi ei ha Assam ha ka nam jong ka jingsngew para briew.
U Sarma u la kdew ba ka Hameed, ka dei kaba iajan bha bad ka Sonia Gandhi bad kaba dei ruh ka dkhot barim jong ka Planning Commission hapoh ka jingialam u Dr. Manmohan Singh kum u Myntri Rangbah duh ka ri bad ka la ju shah khot sngewbha ruh sha ka jylla Assam la bun sien ha ka por ba dang long Myntri Rangbah u Tarun Gogoi.
“Ka la ong ba ki nong Bangladesh ruh ki dei ki briew bad dei ban shah ia ki ba kin sah ha Assam. Lada kane ka long kumta, ki briew ka Assam kin leit sha Bangladesh bad ki nong Bangladesh kin wan sha Assam. Kane ka dei ka jingmut jingpyrkhat kaba ma bha jong ka Congress bad ka Nagarik committee”, ong u Sarma.
Ha ka sngi u Blei ha Guwahati, ka Hameed kala kynnoh ba ka sorkar Assam ka thew beit tang ia ki Muslim da kaba jer kyrteng ia ki kum ki nong Bangladesh. Kala ong,“Kaei kaba bakla lada ki dei ki nong Bangladesh? Ki nong Bangladesh ruh ki dei ki briew.Ka pyrthei ka long kaba heh, ki lah ban im hangne.Ban ong ba ki pynduh ia ka hok jongno jongno ka long kaba sniew bad kaba pynsniew ia ka longbriew manbriew.”
