Dibrugarh, Naiwieng 30 : Ki 15 tylli ki seng sain pyrthei kiba don ha ka Liang Pyrshah, kila lum ia ka dorbar ba arsngi ha Dibrugrah, kaba sdang hynne ka sngi Balang, ban iapyrkhat ia ki lad ki lynti bad ki buit ban lah pynliem noh ia ka BJP ha ka elekshon Lok Sabha 2024.
Ki Nongialam jong kine ki seng sain pyrthei kiba don ha ka lama jong ka United Opposition Forum Assam, kila wan iashim bynta ha kane ka dorbar ban iashim rai ia ki common minimum programme na ka bynta ka elekshon Lok Sabha.
Kine ki seng sain pyrthei ki kynthup ia ka Congress, Assam Jatiya Parishad, Raijor Dal, Jatiya Dal-Asom, Aam Aadmi Party, TMC, NCP, CPI, CPI(M), CPI (ML), RJD, Janata Dal (United), All India Forward Block, All Party Hill Leaders Conference bad ka Shiv Sena (UBT).
Lah ban kdew hangne ba ka United Opposition Forum Assam ka dei kaba la thaw kum shibynta jong ka kynhun synrop Indian National Developmental Inclusive Alliance (I.N.D.I.A) kaba treikam hapoh ka Ri baroh kawei ban iakhun pyrshah ia ka BJP ha ka elekshon ban wan.
Haba kren sha ki nongthoh khubor, u Nongialam ka Congress Bhupen Borah ula ong “ Kane ka jingialang kan sa shim ia ka rai ba khatduh halor ki common minimum programme jong ka elekshon Lok Sabha. Kine ki common minimum programme kin long eh ia ki ishu ka Assam, kiban dei ruh ki mat ialap elekshon”.
U President ka AJP Lurinjyoti Gogoi ula ong “ Ha Assam, u Myntri Rangbah Himanta Biswa Sarma ula pyniaid ia ka Sorkar kum la ka iing ka sem. Ki nongialam barim ka BJP kim sngewtynnad satia ia ka jingtreikam ka Sorkar u Himanta Biswa. Shaei kata ka Sorkar ha Assam. Ka dei ka ‘Jungle Raj’. Ym don satia kiba sngewtynnad ia ka BJP mynta namar ka party kala treikam kat kum ki jingbthah u Himanta Biswa Sarma”.
