Guwahati, Nailar 13 : Ha kawei pat ka jingjia ba sngewtriem, uwei u briew ula shah bom iap ha ki paidbah ha Hajai District ka Assam halor ka jingsuba ba u dei u nongtuh masi.
Une u briew u kyrteng u Hizbur Rahman. Kat kum ka khubor, kane ka jingjia kala jia ha ka miet sngi saitjain ha ka shnong Bamun Gaon ha Hajai.
U Hazibur ula shah bom shnong hadien ka jingiohkem katba u dang tuh ia ki masi na kawei ka sem hapoh ka thain.
Halor kane ka jingjia, ki pulit kila hiar wut wut sha katei ka jaka bad pynkit mar mar ia u Rahman sha Hospital hynrei ki doktor kila pynbna ba ula khlad noh ha shiteng lynti.
Ki Pulit kila pynlong ia ka jingtohkit halor kane ka jingjia bad kila kem ia 6 ngut ki briew. Kine ki briew ki kyrteng u Jayanta Chakraborty, Uttam Chakraborty, Nikhil Das, Sanjay Das, Tulendra Das bad Sanju Mazumdar.
Ki Pulit kila register case halor kane ka jingjia bad ka jingtohkit mynta kala iaid shakhmat.
