Sivasagar, Jylliew 24 : Uwei u samla ba 27 snem ula iap hashen bad u paralok ula mynsaw jur na ka jingshah bom shnong ha ki paidbhur ka Sivasagar District na ka jingsuba ba ki tuh mobile.
Une uba iap u kyrteng u Palu Gowala bad uba mynsaw u kyrteng u Dadu Orang. Kine ki arngut kila shah bat ha ki paidbhur ka shnong Phukan Nagar kaba hap hapoh Sivasagar.
Kat kum ka jingiathuh ki Pulit, kine ki arngut kila leit prong jubor ha kawei ka Iingbriew bad tuh ia ka mobile phone. Ki paidbhur kila ioh ban bat ia ki bad kila shim ia ka ain hala kti da kaba bom shnong ia baroh arngut.
Ki Pulit kila wan poi hadien bad kila ioh ban pyllait ia baroh arngut na ka kti ki paidbah. Hynrei u Gowala ula khlad noh namar ka jingmynsaw kaba jur.
Ki Pulit kila register case halor kane ka jingjia bad ka jingtohkit mynta kala iaid shakhmat.
