Guwahati, May 13: U Director General of Police (DGP) ka Assam GP Singh ula pyntip ba ka Tnad Pulit ka Assam kala ioh ban kurup ia u droks ba shongdor haduh T. 1400 klur ha kine ki arsnem bala leit noh.
Haba iakren bad ki nongthoh khubor ha ka sngi thohdieng ha Guwahati, u DGP ula ong “U Droks ba shongdor palat T. 1400 klur la ioh ba kurup da ki Pulit ka Assam na kylleng ki jaka ka Assam ha kine ki arsnem bala leit noh. Haduh 9309 ngut ki Nongkhaii droks kila shah kem ha kine ki arsnem na kylleng ka Jylla”.
U droks bala ioh kurup da ki Pulit Assam ha kine ki arsnem ki kynthup ia 239 kilo u heroin, 71,902 kg u ganja bad 283 kilo u opium.
U DGP u pyntip “Ki Pulit kila register haduh 5580 tylli ki case hapoh ka NDPS Act. Ka Assam mynta kala don ha ka thup top 10 ha ka jingregister case hapoh ka NDPS Act”.
Ula bynrap ba nalor u droks, ki Pulit kila ioh kurup ruh haduh 98.68 lak u psychotropic tablets, 4.78 lak bitor ka dawai jyrhoh, 214 kg u cannabis bad 40 kg u cocaine.
Ha kajuh ka por, ki Pulit kila leit pynjulor ruh haduh 648 bigha ka jaka ba rep opium bad 32 bigha ba rep ganja ha kane ka juh ka por.
Nalor kane, ula ong ba ki Pulit kila kurup noh ia ki nongkynti ba shongdor haduh T.19.40 klur hapdeng u Jymmang 2021 haduh u Jymmang 2023.
