Dibrugarh, Jymmang 13: Ka Iingkashari ka Dibrugarh District & Session Judge, kala pynkynriah ia ka Tarik ban ai hukum halor ka jingshah lehbeijot bad shah pyniap ka Dr Sarita Toshniwal sha ka 17 tarik Jymmang.
Ia ka rai bala buh ban pynbna hynnin ka sngi Thohdieng, la pynkynriah noh sha ka 17 tarik Jymmang namar ba uwei na ki nongshah kynnoh I Kiru Mech u khlem don satia hapoh ka Iingkashari.
Kat kum ka khubor, u Kiru Mech u khlem wan sha Iingkasahri namar ka jingshitom.
Ka Dr Sarita kala shah pyniap dusmon hapoh ka Assam Medical College bad Hospital katba ka dang don ha ka kam bad ia kane ka kam bymman la leh da u Dr Deepmani Saikia bad u ward boy Kiru Mech ha ka 9 tarik Jymmang 2014.
Ia ka metiap jong ka Dr Sarita la lap napoh ka kamra doktor jong ka Intensive Care Unit (ICU).
Ha kane ka sngi ba shah pyniap, ki Pulit ka Dibrugarah kila kem ia u ward boy jong ka Tnad u Kiru Mech, uba dei u nongshongshnong ka shnong Siringhola, Dibrugarh District, uba hadien ula phla ia ka jingdonkti ha kane ka kam bymman.
U Kiru Mech ula phla ruh ba dei u Dr Deepmoni uba la bthah ia u ban pyniap ia ka Dr Sarita ha ka miet 24 tarik Iaiong ha ka por ba ka hap trei miet hynrei kane kam shym la seisoh satia.
