Guwahati, Risaw 6: U Myntri Rangbah ka Assam Himanta Biswa Sarma ha ka sngi nyngkong u la ong ba ki dkhot jong ka Assam Society ha Singapore, kila pyntikna ba kin iashim bynta bad ban don lang ha ka jingtohkit kaba dang iaid sha khmat halor ka jingkhlad noh u nongrwai ba paw u Zubeen Garg.
Haba kren sha ki lad pathai khubor, u Sarma u la ong, “Namar ba ym don kawei ruh ka ri kaba shah ïa ki pulit bar ri ban pynlong beit ïa ka jingtohkit ha ka jaka jong ki, ki bor synshar jong ka Singapore kin ïasam ïa ki jinglap ba ki la lum bad ka India katkum ka jingïateh kular. U Rupkamal Kalita un sa mih hakhmat ka CID lashai ka sngi. Ha ryngkat bad u, ki don kumba khyndai ngut ki briew shimet ki ban don lang ha kane ka jingtohkit.”
Ka por ba la buh da ka Special Investigation Team (SIT) na ka bynta ban wan mih ïa ki riew shimet ki nong Assam kiba sah ha Singapore kiba ïadei bad kane ka kam ka la kut noh mynta ka sngi. U Myntri Rangbah ka Jylla ula pynpaw biang ba ka jingïatreilang na ki jaidbynriew Assamese kiba don ha Singapore ka long kaba kongsan bha ban pynthikna ïa ka jingïaid shaphrang ha ka jingtohkit.
“Ki nongshong shnong ki dei ban kyntu ïa ki ban ïatreilang; lym kumta, ka jingtohkit kan ïai bteng bad ïaid pyllun,” u la maham.
Haba pynpaw ïa ka jingkyrmen, u Sarma u la ong, “Nga ngeit skhem ba baroh na Singapore kiba donkti kin ïadon bynta lang ha ka jingtohkit shen. Ka thong ba kongsan jong ngi ka long ban pynthikna ïa kaei kaba la jia ïa u Zubeen Garg bad kumno u la khlad noh. Don ki riew shimet kiba la kam ba ki pulit jong ka Singapore ki khanglad ïa ki ban leit sha India, lane ba ki kam jong ki ki lah ban don ha ka jingma lada ki wan ban shah kylli jingkylli.”
U Myntri Rangbah u la bynrap ba ki jingpyrshang ki dang ïaid shakhmat ban pynshlur ïa ka jingïatreilang. “Watla ka jingtreikam ka lah ban shim por, hynrei suki suki ngi dang pynshlur ïa ki ban ïatreilang bad ngeit skhem ïa ka jingïashim bynta jong ki,” u la ong.
Haba pynshai halor ki khubor ba la mudui ejahar (FIR) pyrshah ïa u myntri ka sorkar pdeng u Jyotiraditya Scindia, u Sarma u la kynthoh, “U Scindia um shym la don kano kano ka jingïadei bad u Zubeen Garg, um shym la leit sha Singapore, bad um shym la tip ïa u — hynrei la ujor FIR pyrshah ïa u.Ki don katto katne ngut kiba kwah ban pynthut ia kane ka jinglong jingman.”
Shuh shuh u la kdew ba ki la mih ar tylli ki kynhun — kawei kaba kynthup ïa ki nongkyrshan ba shisha jong u Zubeen Garg, bad kawei pat kaba wad ban pyndonkam bakla ïa katei ka mat ha ka saiñ hima sima. “Wat katto katne ngut ki briew ki bym pat ju ïohsngew ïa ki jingrwai jong u Zubeen Garg mynta kynsan kynsan ki kam ïalade kum ki nongkyrshan jong u. Uwei u la ai jingmut wat ba u Garima Garg u dei ban ïakhun na ka Jalukbari konstitwensi,” ong u Sarma.
Halor ka kaiphod postmortem na ka liang u myntri rangbah u la pynshai ba ym lah ban pynbna paidbah. “Ïa ka kaiphod yn sa aiti sha ka ïingbishar, bad uno uno uba kwah tip ki lah ban apply lyngba ki rukom treikam aiñ,” u la ong.
U Sarma u la ong ruh ba ka sorkar ka la bthah ia ka Enforcement Directorate (ED) ban pynshisha ia ki kot ki sla jong u Shyam Kanu Mahanta. “Ha kawei ka por, ngi lah ban donkam jingiarap na ka central agency, bad nga ngeit ba ki lah ban kyrshan ia ngi ha kane ka kam”, u la bynrap.
