Dibrugarh, Lber 18: Ka All Assam Students’ Union (AASU) hynnin ka sngi Thohdieng ka la thang ia ka dur tyngshop jong u Myntri ka tnat pule puthi ka Assam u Ranoj Pegu hadien ka jinglaittuh ki jingkylli eksam HSLC jong ka sobjek General science and Assamese.
Ka AASU ka la pynlong ruh da ka jingiakhih hynnin ka sngi hapoh Dibrugarh bad hadien ki la thang ia ka dur tyngshop jong u Ranoj Pegu.
Haba kren sha ki lad pathai khubor, u general secretary ka AASU Dibrugarh u Aboni Kumar Gogoi u la ong; “Kane ka jingjia ka long ka jinglehrain kaba khraw hapoh Assam. U Myntri ka tnat pule puthi u dei ban shim ia ka jingkitkhlieh halor kane ka jingjia bad ban iehnoh na kane ka kam kaba u bat.Ka sorkar ka la ialehkai bad ka jingim jong ki khynnah pule.”
“Ha ka kyrteng jong ka ‘Sorkar’ la pynlong kum ka ‘circus’ ha Assam. La dei ban pynkylla ia ka rukom treikam jong ka Secondary Education Board of Assam (SEBA), hynrei na ka liang ka sorkar kam shym la leh ei ei na ka bynta ban wanrah jingkylla hapoh ka SEBA,” ong utei u nogialam ka seng samla pule.
Nalor kata u la pyntip ruh ba ka jingiakhih kan dang iai bteng tad haduh ban da pynioh ia ka jingbishar hok na ka bynta ki khynnah pule. “Ngi dawa ia u Myntri ka tnat pule puthi u Ranoj Pegu ba u dei ban iehnoh kam mardor,” ong u Gogoi.
Ha kawei pat ka bynta uba la shah kynnoh donkti hakhmat eh ha kaba iadei bad ka jinglaittuh ka jingkyll jong ka eksam HSLC ha Assam u Kumud Rajkhowa u la wan pyndem noh hakhmat ki pulit hapoh North Lakhimpur police station hynnin ka janmiet sngi Thohdieng.
Katkum ki khubor la ong ba u Rajkhowa uba dei u headmaster jong ka Dafalakata High School ha Lakhimpur district u la wan pyndem noh hadien ka jingkhot jong u DGP ka Assam u GP Singh.
