Guwahati, Nohprah 23: U Myntri Rangbah ka jylla Assam Himanta Biswa Sarma u la pynpaw ba ka Sorkar kala pynkhlain ia ka jingpeitngor haki thain khappud ka Jylla namar ka huri hura bad ki kam umsnam haka ri Bangladesh.
Haba kren sha ki lad pathai khubor, u Himanta u la ong ba man la ka jingjia ha shiliang khappud, ka Sorkar Assam ruh ka peitngor bad bishar bniah bha ia ka jinglong jingman bad kam ju khein sting satia.
“Baroh ngi la ïohi ba kumno ki jaidbynriew Hindu ki shah pynshitom beiñ bad shah thang im ha Bangladesh. Ki nongïalam jong ki ki ju kren man ka por ba ka Northeast India ka donkam ban phiah bad ban synshar da ka Bangladesh” la ong u Himanta.
U Himanta u la pynpaw ïa ka jingsngewkhia kaba jur halor ka jinglong jingman ha Bangladesh, da kaba kynnoh ba ki jaitbynriew Hindu ki ïakynduh ïa ki jingshah thombor naka por shaka por.
U Myntri Rangbah u la ban jur ba ka Assam ka la mad ïa ki jingeh ha ka histori kiba ïadei bad ka jingwan rung tuh ki nong Bangladesh bad u la ong ba ka jinglong jingman kaba mynta ka dawa ïa ka jingpeitngor kaba jur.
U la pynpaw ba ka jingpynneh ïa ka jingshngaiñ hapoh ka ri bad ka jingïada ïa ka aiñ ka shongsuk shongsaiñ ki dang long ki mat ba kongsan tam, khamtam haba kheiñ ïa ka jingjan jong ka Assam bad ka Bangladesh.
Haba pynkynmaw biang ïa ka nongrim jong u kaba mynshwa, u Himanta u la pynrem ïa ki jingkren ba ju mih na ki katto katne ki bynta jong ka Bangladesh kiba kyrshan ïa ka jingdawa phiah iaka thaiñ shatei lammihngi jong ka ri India.
U la pynskhem ba ka jinglong jong ka India ha ka pyrthei—kum ka ri kaba don ki namding nuclear bad ka ri kaba saw ba khlain tam ha ka pyrthei—ka mut ba kum kine ki jingpynkhih kin ym sah khlem jubab.
U Himanta u la ong ruh ba ka jingpynkynriah iaki ba wan buhai shnong be-aiñ kan dang ïai bteng ha kylleng ka Assam. “Ngin iai bteng ia katta. Ngi don ka jingthmu ban pynkynriah noh ia baroh kiba wan buhai shnong beain.”
