Guwahati, Nailar 08 : Khnang ban pynkut noh ia ka jingpyniashongkha khynnah, ka Sorkar Assam ha ka sngi Palei, kala pyllait paidbah ia ka skhim ka ban ai jiniarap song pisa ba manla u bnai sha ki samla pule kynthei.
Kane ka skhim bala ai kyrteng ka Mukhya Mantrir Nijut Moina Asoni (MMNMA) la khmih lynti ba kan kot ia ka jingpynlut ba T.300 klur na ka pla tyngka ha u snem ba nyngkong bad kumba T.1500 klur ha ki san snem.
Kane ka skhim kan nang pynbun ia ka jingdon ki khynnah kynthei ha ki skul, ki college bad ki university bad kumba 2 lak ngut ki samla pule kynthei la khmih lynti ba kin rung skul biang ha une u snem ba mynta.
U Myntri Rangbah ka Assam Himanta Biswa Sarma ula ong ba ka National Family Health Survey 2019-2021 kala shem ba haduh 31.8% jong ki kynthei ba hapdeng ka rta ba 20-24 snem kila long kmie, kala pyni ba bun ki kynthei kila poi iashong kha hashuwa ba kin kynjoh ia ka rta bala shah ka ain kaba long 18 snem.
“Kila ioh lok ha ka por ba kim pat long rangbah, kim pat pyndep ia ki jingpule lane don ka bor met ban ioh khun. Ha ki katto katne ki khep, kine ki kynthei ki kut ka long langknia jong ki kam thombor hala iing” ong u Himanta.
Haba thoh ha X, u Himanta ula ong “Nga la ioh ia ka jingai jingmut kaba biang eh na iwei I Khynnah pule ha ka jingpyllait ia ka #NijutMoina Asoni. Ngin sa leh eiei halor kane ka jingai jingmut bad ngin leh ia kaba donkam ia kane ha kaban iaid pynsngewthuh ia ki khynnah shynrang ba kin khang ia ka jingpyniashongkha khynnah”.
