Guwahati, Rymphang 20: U Professor ba Khynnah tam ka pyrthei Soborno Isaac Bari ha ka jingwan iuhkjat ha Assam ula ai jingmut ia ki samla pule ba kin pule bha ia ka maths bad science ba kin tip shaphang ka pyrthei ha ka lynti kaba dei.
Haba iakren bad ki nongthoh khubor ha Kokrajhar, u Soborno Isaac Bari ula ong “Ka maths bad science ki dei ki sobjek ba kongsan bha ha ka pule dangle ka juk ba mynta, kine baroh artylli ki sobjek ki dei kiba kongsan bad ki samla pule ki dei ban pule jylliew bha ia kine ki sobjek”.
“Nga la wan sha Bodoland University bad iakren bad ki nonghikai lem bad ki samla pule. Ka dei ka jaka ba itynnad bha namar ka jingpher ha ka dei riti bad jingleh tynrai. Ha ki snem ban wan, ngan sa leit sha ki Univeristy ban pynsaphriang ia ka jingieid ban pule ia ka maths bad science” ula ong.
U Professor Bari ula iashimbynta ha ka 2nd Inter College Youth Festival bala pynlong da ka Bodoland University. Une u professor ba khynnah tam ha Pyrthei ula iakynduh bad iakren iakhana shaphang ka maths bad science bad ki professor, ki nonghikai bad ki samla pule jong ki jaka pule bapher bapher ka Kokrajhar.
U Professor Bari un leit iashimbynta ruh ha ka jingialang la sngi nyngkong kaba la pynlong da ka BTC Education Department ka Bodofa Cultural Complex ha Kokrajhar.
U Professor Bari u dei uba la ioh ia ka ‘Global Child Prodigy Award’ n aka Nobel Laureate Kailash Satyarthi. Ha ka rta ba 4 snem, u Bari ula ioh ia ka jingithuh na u President Barack Obama halor ka jingjop jong u ha ka sobjek maths bad science.
