Dibrugarh, Jylliew 4: Ka Assam mynta kala nangpynjur ia ka jingkhynra pyrshah ïa u drok bad ha ka sngi Ba-ar ki Pulit poi khynra ïa kawei ka psychiatrist’s clinic ha Digboi, bad ioh kurup ïa shibun ki dawai buaid bad kem ïa u doktor uba pynïaid ïa katei ka jaka sumar.
Ia kane ka jingkhynra la pynlong ha ka clinic u psychiatrist Dr. Sandeep Das, ha kaba ki pulit ki la ioh kurup shibun ki dawai pynbuaid kiba la ngeit ba ki hap ha ki kyrdan ba la khein beain. Ki heh ki la kurup ruh ia ka pisa kaba T.1.03 lak na katei ka jaka.
Ki pulit ki la kem ia u Dr. Das ryngkat bad uwei pat u riew shimet uba la kynnoh ba u thied dawai khlem ki kot ki sla kiba donkam katkum ka ain.
Ki nongtohkit ki la ithuh ba utei u briew u dei u Suman Gogoi uba shong basah ha Dirak.Katkum ki pulit, la kynnoh ba u la thied ia ki dawai kiba shongdor kumba 53 hajar tyngka khlem da bud ia ki kyndon ain kiba dei ban bud ia ka jingdie bad jingthied ia ki dawai kiba la teh lakam.
Ki tyllong khubor ki la ïathuh ba kane ka jingtreikam ka long shi bynta jong ka jingpyrshang kaba kham heh jong ki bor pynïaid ain ban pynkhlaiñ ïa ka jingpeitngor halor ka jingpynkylla lynti bad jingpyndonkam bakla ïa ki dawai ba la ai da u doktor, ka mat kaba la nang wan hapoh ka jingpeit bniah hapdeng ka jingpynshitom kaba kham heh jong ka Assam ïa ki dawai pynbuaid (narcotic) bad ki jingdih buaid (substance abuse).
Mynta ki heh ophisar ki dang bishar bniah ïa ki kot ki sla, prescriptions, stock registers bad ka purchase records ban tip la ki don ne em ki jingpynkheiñ ïa ki kyndon ban tehlakam ïa u drok ne kiwei kiwei ki kyndon aiñ.
“Ka jingtohkit ka dang iaid bad ki dang eksamin ia baroh ki kot ki sla.Yn sa shim kam ne pynshitom katkum ka ain,” la ong uwei u heh pulit.
Kane ka jingjia ka la khring ïa ka jingpyrkhat shaphang ka jingsngewkhia kaba nang jur hapdeng ki bor pynjari aiñ ha kaba ïadei bad ka jingpyndonkam bakla ïa ki dawai ba la ai da u doktor bad ki dawai ba la shna da ki doktor, kaba ki riew shemphang ki ong ba teng teng ka lah ban long kum ka lad kaba pher na ka bynta ka jingdih buaid bad ki jaka sam dawai beaiñ.
Ki pulit ki la ong ba ka jingleh kaba kham bniah kan shong ha ka jinglap jong ka jingtohkit kaba dang iaid shakhmat.
