Guwahati, Nailur 22 : Phra ngut ki samla pule ka NIT Silchar, kila poi hospital namar ka jingiakhih da kaba iashah jingit khlem pud, kaba iaid mynta ka sngii Thohdieng sha ka sngi ba san.
Kane ka jingiakhih ki samla pule ka NIT Silchar kala mih namar ka jingdawa ia ka jingbishar kaba hok ia uwei u samla Pule Electrical Engineering bala pule ha ka 3rd year u Koj Buker, uba la sdien phasi hala ka jong ka hotel myn ha ka 15 tarik Nailur.
Ha ka sngi Nyngkong, palat 2000 ngut ki samla pule kila iamih ban iashong shah jingit haba dawa ia ka jingiehnohkam jong u Dean Academics, BK Roy.
Kat kum ka jingong ki samla pule, ha kine ki lai 5 sngi, palat 10 ngut ki samla pule kila iapler bad phra ngut la hap ban pynkit noh sha hospital.
Ha ka jamiet sngi Palei, uwei u samla pule ba iakhih uba kyrteng u Harsh Kumar Singh, ula kyllon bad la pynkit mar mar ia u sha Silchar Medical College and Hospital.
U Registrar ka Silchar NIT KL Baishnab ha ka sngi Palei ula pyntip ba ka jaka pule kala pynpaw ia ka jinglong ba kloi ban pynurlong ia ki jingdawa jong ki samla pule ba iakhih laitnoh tang ka jingiehnohkam jong u Professor BK Roy.
Ha kawei ka liang, u Kpa jong u Koj Bukar u Koj Pullo, ula pyntip ba un sa leit ban ujor noh da ka ejahar pyrshah ia ka Silchar NIT.
U pyntip ba ka Iing kala dep thoh ia ka shithi sha u Myntri Rangbah ka Arunachal Pradesh Pema Khandu bad sha u Myntri ki kam pohiing ka Ri Amit Shah halor kane ka jingjia.
