Guwahati, Nailur 22 : Ka Sorkar Assam kala pynkhreh mynta ban wanrah ia ka skhim ba thymmai ka ban ai song jingiarap da ka pisa ba mar T.2 lak sha uwei pa uwei u samla ba khlem kam ba un lah ban sengkam lajong.
Ia kane la pyntip da u Myntri Rangbah ka Jylla Himanta Biswa Sarma uba la iathuh ba ia kane ka skhim la tip kum ka ‘Mukhya Mantri Atmanirbhar Asom’ bad ka jingpynrung kyrteng kan sdang naduh ka 23-24 tarik Nailur.
U Himanta ula pynbna ia kane lyngba ka video conferencing ha ka jingiadonlang u Chief Secretary bad ki Heh Ophisar ka Jylla, na ka conference hall jong ka Assam House ha New Delhi.
U Himanta ula ong b aka ‘Mukhya Mantri Atmanirbhar Asom’ kan ai jingmyntoi ia 2 lak ngut ki samla ba khlem kam hapoh ka Jylla. Ka jingpynrung kyrteng ha kane ka skhim kan long naduh ka 23 ne 24 tarik Nailur, ka ban plie jingkhang ia ki samla ka Jylla sha ka lawei kaba phyrnai.
Ka thong ba hakhmat eh jong kane ka skhim ka long ban pynshlur ia ka jingsengkam sengjam ia ki samla ka Jylla Assam. Da ka jingai song jingiarap, ka Sorkar ka thmu ban pynkupbor ia kine ki samla da ki jingdonkam ba kin lah ban leh ia kano kano ka kam da lade bad ban long ki nongsynniang lem sha ka ioh ka kot jong ka Jylla.
