Tezpur, Iaiong 06 : Ka President Droupadi Murmu ka la wan poi ha Tezpur, Assam mynta ka sngi ha ka jingwan jurip kaba laisngi kynthih sha kane ka jylla.
Na ka liang u Myntri Rangbah(CM) ka Assam u Himanta Biswa Sarma bad u Lat Gulab Chand Kataria ki la pdiang sngewbha ia ka Murmu hapoh ka kad liengsuin Tezpur Airport.
U CM ka Assam u la pynpaw lyngba ka Twitter da kaba thoh; “Ngi pdiang sngewbha ia phi Adarniya Rashtrapati ji sha Assam.Ngi sngew burom shikatdei eh ia ka jingiadon ryngkat bad ka jingkyrkhuh ka jong phi.”
Ka President Murmu kan leit ban iashim bynta ha ka tamasa ‘Kaziranga Gaj Utsav’ kum ka nongshah khot sngewbha ba kongsan ha kane ka jingleit jurip ba lai sngi jong ka shapoh Assam.Ka president kan iashim bynta ha kaba leit jurip ia ki jaka kiba itynnad jong katei ka park lyngba ka jeep bad da kaba shong halor jong u hati.
Ia kane ka tamasa ‘Kaziranga Gaj Utsav’ la ju pynlong man la ka snem hapoh kane ka national park shibynta ban iarap ban aijingiada ia kine ki jait hati jong ka thain Asia kiba don ha kane ka jaka.
Ia kane ka tamasa la pyniaid da ka tnat tourism bad ka tnat forest da ka jingthmu ban pynshai paidbah ha kaba iadei bad ki jingiatyngkhuh hapdeng ki briew bad ki hati ha ki byna bapher bapher ka jylla bad ruh ban wad ia ki lad ki lynti ban weng ia kiba kum kine ki jingeh.
Haduh kumba shispah tylli ki hati ka thain Asia kiba don ha kane ka jaka ia kiba la pynriam bha naduh khlieh haduh kjat kin iashim bynta ha kiba bun tylli ki bynta jong ka jingialehkai, kata kum ka ka shad, ialehkai football, parade, iakop mareh bad kiwei pa ki ban pynbyrngia ia ki nongwan peitkai.
Nalor kata ka President Murmu kan leit iashim bynta ruh ha ka jingrakhe ia ka lyngkhuh snem kaba 75 jong ka iingbishar Gauhati High Court kaba la sdang naduh hynnin ka sngi Balang ha ka 7 tarik mynta u bnai.Ha kane ka jingialang yn ia don lang ruh u Justice Dhananjaya Y Chandrachud uba dei u Chief Justice jong ka India.
