Guwahati, Nailar 07: Haduh 44 ngut ki briew kynthup ia 9 ngut ki Pulit kila mynsaw ha ka jingiatynjuh bor hapdeng ki paid nongiakhih ba dawa ban kyndang ia baroh ki ‘nongshongshnong be-ain” bad ki Pulit ha Karbi Anglong District ha ka sngi Ba-ar.
Kine ki nongiakhih kila pynlong ia ka rally ba dawa ban kyndang ia baroh ki nongshong shnong beain, hynrei haba kane ka rally ka dang iaid ha lynti sha Tinali, kynsan kynsan ki Pulit kila siat da ki ktang suloi sha suin bad pyndonkam ia ki lathi ban pynsaphriang ia ki paidbah.
Ia ki nongiakhih la shah ba kin iaid sha ka Ophis jong ka Karbi Anglong Autonomous Council (KAAC) bad aiti ia ka dorkhas sha u Chief Executive Member (CEM).
Katto katne ki seng kila pynlong ia kane ka rally ban dawa kyndang noh ia ki nongshongshnong beain kiba sah ha ki Professional Grazing Reserve (PGR) bad ki Village Grazing Reserve (VGR) hapoh ka District ka Karbi Anglong bad West Karbi Anglong.
Ka jingkulmar kala mih hadien ba kinne ki nongiakhih kila pynkylla ia ka lynti iaid bad ki khlem sngap satia ia ki bor pahara haba la bthah ia ki ba kin iaid beit thik na ka lynti iaid kaba la pynbeit.
