Guwahati, Rymphang 9: Ka jingïakynad saiñpyrthei hapdeng ka BJP bad ka Congress ha Assam ka la nangjur ha ka sngi Nyngkong hadien ba u President ka Assam Pradesh Congress Committee (APCC) Gaurav Gogoi u la kynnoh ïa u Myntri Rangbah ka Jylla u Himanta Biswa Sarma ba u la “tam palat pud” da kaba kdew ïa ki khun ba dang rit ka rta ba ki don ka jingïadei bad ka Pakistan.
U Gogoi u la ong ba ki thma saiñ pyrthei ki dei ban sah tang hapdeng ki nongïalam bad kim dei ban pynïadei ïa ki khynnah kiba dang rit.“Ka jingkdew ïa ki khun jong nga kiba dang san snem bad khyndai snem ka la palat ïa ki pud baroh.Nga long uba kloi ban ïakynduh ïa kano kano ka jingshah thombor shimet, hynrei ngan ym sngap jar lada ki khun jong nga, ki nongtrei Congress ne ki nongshong shnong ba rit paid ki shah thombor,” u la ong, da kaba maham ba un bud ïa ka kam “haduh kaba kut” lada kum kine ki kam ki dang ïai bteng.
U Gogoi u la jubab halor ka jingïalang bad ki nongthoh khubor kaba la neh haduh 2.5 kynta da u Myntri Rangbah ka Jylla ha ka Sngi U Blei, ha kaba u Sarma u la buh jingkylli halor ka jingleit jong u Gogoi sha Pakistan mynshwa bad u la kdew ïa ka kaiphod jong ka kynhun tohkit ka Special Investigation Team (SIT).
Haba kyntait ïa kitei ki jingkynnoh, u Gogoi u la ong ba u Sarma um shym la lah ban pyni ïa kino kino ki sakhi sabut. “Hynnin ka sngi, ha ka jingïalang bad ki nongthoh khubor kaba la jrong 2.5 kynta, u Myntri Rangbah um shym la lah ban pyni ïa kano kano ka jingpynshisha ba nga dei u agent jong kawei pat ka ri. U la don ïa ka kaiphod jong ka SIT na ka bynta ki hynriew bnai ba la dep. Lada kane ka dei shaphang ka jingïada ri, balei u la sngap jar haduh katne?” U Gogoi u la kylli, da kaba kynnoh ba ka SIT ba la thaw da ka sorkar jylla kam lah ban pynshisha ia kano kano ka jingleh bakla.
Shuh shuh u la buh jingkylli, balei ba u Myntri Rangbah ka Jylla u la kdew kham mynshwa ba ïa ka kaiphod jong ka SIT yn sa pynbna paidbah ha ka 10 tarik u Nailar hynrei um shym la leh kumta.
Ki MP jong ka seng Congress, u Pradyut Bordoloi bad u Rakibul Hussain, ki la mih lang ban ïada ïa u Gogoi, ha kaba ki la khot ïa kitei ki jingkynnoh, ba ki dei ki jingkynnoh “kiba kit jingmut ha ka saiñpyrthei” bad kiba thmu ban pynkhih win ïa ki nongthep vote, ha shwa ka elekshon ban wan.U Hussain u la batai ïa ki jingkynnoh kum ki “bym don jingmut” bad u la ai jingmut ba kine ki mih na ka daw jong ka “jingbym shngaiñ ha ka saiñ hima sima” katba ka jingpaw nam jong u Gogoi hapoh ka Congress jong ka jylla ka nang kiew.
Haba jubab halor ki social media, u Myntri Rangbah ka Jylla u Sarma u la buh jingkylli ïa ka jingleit jong u Gogoi sha Takshashila (Taxila), kaba don ha Rawalpindi district jong ka Pakistan, da kaba kylli kumno u leit jngoh ïa katei ka jaka lada ka visa jong u ka ailad ban leit tang sha Lahore, Karachi bad Islamabad.U Sarma u la kynthoh ba hapoh ka Pakistan’s immigration rules, ka jingleit shabar jong ki nongbah ba la buh visa ka donkam ïa ka jingbit ba kyrpang, bad kylli mano ba pynsuk ïa kane ka jingleit jngoh, da kaba kdew ba ka Rawalpindi ka don ruh ïa ka iing sah jong u Army’s General Headquarters jong ka Pakistan.
Katba ka thma ktien ka nang jur, ka jingïakynad ka la pynkhreh ban pynjur ïa ki jingïapher jingmut ha ka saiñ hima sima ha Assam shwa ka thma elekshon ban wan.
 Gaurav Gogoi u la kynnoh ïa u Myntri Rangbah ka Jylla u Himanta Biswa Sarma ba u la “tam palat pud” da kaba kdew ïa ki khun ba dang rit ka rta ba ki don ka jingïadei bad ka Pakistan.){kind=link}