Guwahati, Naitung 06: Ka Enforcement Directorate (ED) kala ioh ban kyndang ia ka jingkynnoh khaii tuh ia u kwai uba kot T.1500 Klur bad ka jingpyniaid be-aiñ ia ka pisa ha kylleng jong ka Jylla Assam, Mizoram, West Bengal bad Uttar Pradesh, kaba poi ruh shaduh sha Myanmar.
Da kaba shimkhia hapoh jong ka Prevention of Money Laundering Act (PMLA), ka ED kala leit khynra ha ki 20 tylli ki jaka ha ka 3 tarik u Naitung hadien jong ka jingtohkit halor ka jingkhaii be-aiñ ia u kwai ha khappud jongka Indo-Myanmar bad ka jingpyniaid be-aiñ ia ka pisa lyngba katei ka kam khaii.
Kane ka jingtohkit kala mih na kiba bun tylli ki ejahar kiba la rejistar ha Assam halor ka jingkhaii tuh ia u kwai bad ka jingkiar ban siew ia ka khajna jong ka tnad Custom. Kadei ruh ka jingbuddien, hadien ba ka Directorate of Revenue Intelligence (DRI) kala pynlong ia ka jingkhynra, ha kaba kala ioh kurup haduh 655.32 metric ton u kwai bad ia ki kali kiba la pyndonkam ha kaban kit ia une u kwai.
Katkum ka jingong jong ka ED, kane ka jingkhaii kadei kaba la pyniaid da ka kynhun ki nongkhaii kiba bun kiba dei na ka Champhai District, Mizoram, ki nongbei tyngka bad ki nongpynkit kiba na Assam bad ki nongkhaii kiba don ha kylleng jongka West Bengal bad Uttar Pradesh. Kane ka kynhun kala jer ruh ia ka kyrteng jong ki katto katne ki nongiarap ia kane ka kam khaii ia kaba la ngeit ba kidei kiba donkti lang ha katei ka kam khaii.
Ki nongtohkit kila lap ba ka Champhai District kadei ka jaka pdeng jong ka jingkhaii, hynrei ha ki rekod la shem ba kam shim la don kano kano ka jingpyni ia kano kano ka jingpynmih ia u kwai na katei ka jaka bad kane kala pynkhlain ia ka jingsuba ba kine ki mar kidei kiba khaii tuh na Myanmar lyngba ka khappud ha Zokhawthar.
Ka ED kala kynnoh ba kane ka kynhun kala shna thok ia ka GST Invoice, ki nongkhaii snaiap bad ki kot kiba la shna thoh ha ka jingpynkit ia ki mar ban pynkylla kum ki kot khaii kiba la ithuh da ka aiñ. La kynnoh ba ia kine la pyniaid lyngba ki nongthied na West Bengal bad Uttar Pradesh, kaba la iaid lyngba pat lyngba bun tylli ki Bank Account bad ki kynhun hashwa ban pynpoi biang sha ki nongkhaii ha Myanmar lyngba ka Hawala Networks.
Ki nongtohkit ha kaba iadei bad ka pisa pilain kaba kynthup ia ki Bank Accounts, GST Returns bad ki jingtip kiba iadei bad ka jingkhaii shabar ri, katei ka kynhun kala pynmih bad pyniaid be-aiñ palat ia ka T.1500 Klur lyngba ka Web kaba bon bun tylli ki Current Account, ki kompani bad ki kynhun khaii bapher.
Ha katei ka jingkhynra, ka ED kala ioh kurup ia ki kot ki sla kiba kongsan, ki kot jong ki jingdon ia ka spah ka phew, ki rekod ha ka khaii pateng, ki mobile phone, Laptop, Hard Drive bad T.1.30 Klur ka pisa ia kaba ym shim la lah ban ai jingbatai.
Ka Agency kala pynsangeh treikam mardor ia ki 33 tylli ki Bank Account ia kaba la kynnoh ba kidei kiba donbynta ha katei ka kam khaii be-aiñ.
Ha ka jingtohkit la pynpaw ruh ba ia ka pisa kaba la ioh lyngba katei ka kam khaii be-aiñ la pynlut ha ka jingthied ia ki iing bad ki building kiba heh ha Champhai, Silchar, Guwahati, Nabadwip, Falakata, Kolkata bad Varanasi.
Ka ED kala ong ba kane ka jingtohkit mynta ka dang iaid shakhmat.
 kala ioh ban kyndang ia ka jingkynnoh khaii tuh ia u kwai uba kot T.1500 Klur bad ka jingpyniaid be-aiñ ia ka pisa ha kylleng jong ka Jylla Assam, Mizoram, West Bengal bad Uttar Pradesh, kaba poi ruh shaduh sha Myanmar.){kind=link}