Guwahati, Jylliew 5: Arngut ki briew kila shah siat iap bad arngut kila mynsaw jur ha ka jingiather kuli ha khapud ka Assam bad Arnachal Pradesh, ha ka shnong Panbari, Dhemaji District hynne ka sngi nyngkong.
Kine kiba iap ki kyrteng u Boga Churia bad u Monitur Gagoi ba na Dhemaji. Kat kum ka khubor, ka kynhun ki riew kieng atiar na Arunachal Pradesh kila wan ban synreit kuli beit beit ia ki paidbah ba don sha ka liang ka Assam kiba dang iathung dieng kum shibynta ban rakhe ia ka World Environment Day.
Ka jinglong jingman kala shongsyier bha ha khappud ka Assam-Arunachal Pradesh hadien kane ka jingjia.
Kat kum ka jingong ki Pulit, u Boga Chutia ula iap hashen katba u Monitur Gagoi ula iap ha lynti sha Hospital. Kiba mynsaw ki kyrteng ka Pushpa Gagoi bad Akoni Gohain.
Kat kum ka khubor, s alai ngut ki briew la ioh jingtip ba kila shah rahbor ha kine ki riewkiengatiar hadien kane ka jinghiar thma kynsan kynsan.
Ki Bor Pulit kila hiar kyrkieh sha kane ka jaka khappud bad kila pynlong ia ka jingkhynra kaba jur bha ban lapdien bad pyllait im ia kiba shah rahbor.
Haba iakren bad ki nongthoh khubor, u Myntri Rangbah ka Assam Himanta Biswa Sarma ula ong “Haduh mynta ngim pat lah ban phiah ia u pud u sam jong ngi. Ha ka jingshisha, ki Jylla ba marjan kim ju hiar thma ia ngi. Katto katne ki briew na ka Jylla ki leh ia kane ka kam tang ban knieh jaka. Ki Pulit kin sa tohkit ia kane ka kam bad kin sa leh tyngeh kat kum ki kyndon Ain”.
