Guwahati, Naiwieng 17 : Sa artylli ki metiap la ioh ban tam narud ka wah Barak kaba don marjan ka Chirighat ha ka thain Banskandi jong ka Cachar District ka Assam ha ka sngi U Blei, kaba la nang pynkyan shuh shuh ia ka jingiakynad hapoh ka thain.
Kine ki metiap ki dei jong kawei ka longkmie ba 65 snem bala tip kyrteng ka Yurembam Rani Devi bad u Khun ksiew ba 2 snem shiteng ba kyrteng u Laisram Chingkheiganba Singh.
U Superintendent of Police ka Cachar District Numan Mahatta ula poi ha ka jaka ba lap ia ka met bad ula pynbeit ban pyn kit ia ka met sha Silchar Medical College and Hospital ban leh ia ka post mortem. U Uttam Singh, u nongshongshnong ka Jiribam, ula pynithuh ia kine kum ki bahiing hasem jong u.
Kane ka jinglap ia kine ki metiap kala wan jia hadien ka jinglap ia lai tylli ki metiap ha ka sngi Thohdieng n aka thain Jirimukh kaba don ha khappud ka Assam-Manipur. Kine ki laingut ki kyrteng ka Telem Thoibi Devi ba 31 snem, ka khun ba kyrteng ka Telem Thajmanbi Devi ba 8 snem bad u Khun ba dang 8 bnai ba kyrteng u Laisram Langamba Singh.
Ki Ophisar ka Manipur kila pyntip ba haduh 7 tylli ki metiap jong ki nongshongshnong ka Jiribam kynthup ki 5 ngut ki briew na kajuh ka longiing, kila don mynta ha SMCH. Kila pyntip ba arngut ki tynmen na Jiribam kila shah pyniap haki riew kiengatiar ha Jakuradhor myn ha ka 11 tarik Naiwieng.
Kine ki 5 ngut kiba shah pyniap la ngeit ba ki dei napdeng ki 6 ngut ki briew kiba shah rahbor ha ka 11 tarik Naiwieng n aka thain Borobekra Sub Division ha Jiribam. Kane ka kynhun ka kynthup ia 3 ngut ki kynthei bad lai ngut ki khynnah kiba dei na ki jaidbynriew Meitei.
