Dibrugarh, Jylliew 6: Ka jingiasiat kuli kaba mar kylliang kaba jur bha, kala jia hapdeng ki shipai Para SF bad ki kaikhlaw ha Longding district jong ka jylla Arunachal Pradesh.
Halor ka jingioh khubor ia ka jingdon ki ehrang kaikhlaw ha ka thain General jong ka Pongchau Circle ka Longding district, Arunachal Pradesh, kaba don ha khappud Indo-Myanmar, ki bor pahara kila pynlong ka jingkhynra kaba jur ha kane ka jaka khappud ha ka sngi Palei.
“Katba ki dang ïaid lyngba ka khlaw ba rben, ka kynhun shipai kila iohi ia ki briew ki bym ithuh satia bad kila pyrshang ban kren ia ki hynrei kine ki briew kila synreit kuli naphang sha ki shipai na ki tiar kiba khlain bor, kaba la pynlong ia ki shipai ban pynphai markylliang”ong u wei u heh ophisar.
Hapdeng ka jingiakhun kaba jur, kine ki briew ki la phet bak na katei ka jaka bad jam noh sha shilliang jong ka International Border ka ban leit sha Myanmar.
Ia kane ka jaka ki shipai ba pahara kila pynlong ia ka jingwad bniah, hynrei kine ki briew kila phet noh sha shiliang pud ban rieh tngen ha khlaw.
