Guwahati, Naiwieng 20: Ka Directorate of Enforcement (ED) kala lap ia ki kam thok kaba la kot da ki klur tyngka ha kaba iadei bad ka jingdonkti ban ai da ka hukum thok ban supply ha ka kyrteng jong ka Autonomous Council ha Assam, hadien ka jingpynlong ia ka jingkhynra ha kylleng ki jaka ha Guwahati, Kokrajhar, Tezpur bad ha New Delhi ha ka sngi ba-ar.
La pynlong ia kane ka jingkhynra hapoh jong ka Prevention of Money Laundering Act (PMLA), 2002—kaba dei shi bynta jong ka jingtohkit kaba dang iaid pyrshah ia u Rishiraj Kaundinya, Biju Das, Mukesh Jain, bad kiwei de kiba shah kynnoh ba ki la pynlong ia ka kam thok kaba la pynbeit bha da kaba shna thok ia ki kot ki sla jong ka sorkar ban leh thok ia ka supply.
Katkum ka ED, Kine kiba shah kynnoh ba kila shna ia ka purchase order thok, ka jingsoi ba thok, ka check ba thok bad ka payment clearance notes ba thok, bad kine baroh kila pyndonkam bakla ia ka kyrteng jong ka Dima Hasao Autonomous Council, Mising Autonomous Council bad kiwei de.Ki nong supply na kylleng ki bynta ki kynthup ia ki blankets, tarpaulins, dyed yarn, solar equipment, bad ki infrastructure materials—la shah pynngop ha ryngkat bad ki order ba thok.
Ka jingtohkit ka la pynpaw ba ki la dawa ïa ka advance commission kaba heh na ki suppliers kum ka jingpynbeit lypa ban pyntreikam ïa kine ki order thok. Hadien la pynlong ia ki suppliers bad pynthikna ia ki jingsiew, ki la pynkylla ia ki mar, ki la pynlong ia ka jingpynhap mar khlem jingbit, bad ki la pynthikna ba ym shym la siew satia na ka bynta ki mar.
Na kane ka jingleh thok, la pynlong ban ym siew ia ka pisa kaba la kot haduh T. 9.86 klur sha ki suppliers ba dei hok, katba ki nongshah kynnoh ki la lum ïa ki commission be-aiñ jaba kot haduh T.2.04 klur kiba la teh bad ki order ba la shna thok.
Ha ka jingtalasi ha ka sngi Ba-ar, ka ED ka la lap T.14.5 lak ka pisa, ki account Bank kiba don T.13.68 lak, kiba la shah khang mynta, ar tylli ki kali heh—ka Innova Hycross bad ka Toyota Fortuner, ka jingiateh kular ban die jaka kaba shongdor T.65 lak bad ki kot ki sla kiba la suba ba ki don jingiadei bad ki kam runar kiba bun jait, digital evidence ne ki sakhi bad ki jingtip ba bniah shaphang ki jingdon jingem ba la pyndap kiba iadei bad u nongshah kynnoh.
Ki heh ophisar ki la ong ba ki sakhi ki kdew sha ka “jingthmu runar ba la pynbeit bha” ne ka “well-organised criminal conspiracy” kaba la thmu ban pyndonkam bakla ïa ki rukom treikam jong ka sorkar bad ban thok ïa ki nong supply ki bym tip ei ei ha kylleng ki bynta.
Ka ED ka la pynjur ia ka jingpeit bniah ia ka pisa tyngka bad mynta ka dang trei ban wad ia ki jingmih ba kham bun na ki kam runar, ban pyniasoh ia ki mar ki mata, bad ban pynthikna ia ka jingsiew biang ia ki lanot lyngba ki kyndon ain kiba dei.
Ka jingtohkit ka ba kham bniah ka dang iaid shakhmat.
 kala lap ia ki kam thok kaba la kot da ki klur tyngka ha kaba iadei bad ka jingdonkti ban ai da ka hukum thok ban supply ha ka kyrteng jong ka Autonomous Council ha Assam, hadien ka jingpynlong ia ka jingkhynra ha kylleng ki jaka ha Guwahati, Kokrajhar, Tezpur bad ha New Delhi ha ka sngi ba-ar.){kind=link}