Guwahati, Iaiong 20: Ha kawei ka jingjia kaba la pynpar niang khriat bad ba la pynshaiong ha kawei ka jingjia ha Chirang District jong ka jylla Assam, u wei u briew uba la 60 snem ka rta la kynnoh ba u la khrai khlieh ia la ka jong ka kurim bad u la rah lang ha kti ban leit pyndem ia lade ha police station.
Kane ka jingjia kala jia ha ka janmiet sngi Saitjain ha Uttar Ballamguri, Bijni. Ia une u briew la tip kyrteng Bitish Hajong, uba dei u nongbylla sngi la kynnoh ba u la pyniap ia la ka jong ka kurim ka Bajanti Hajong, hadien ba la mih ka jingiakynad.
U Bitish u la buh ia ka khlieh ha ka shang jong ka bicycle ka jong u da kaba iaid pyllun ban leit pyndem ia lade sha Ballamguri police outpost.
Katkum ka jingiathuh kiba sah marjan, kine ki shi kurim man ka por ki ju ia ka jia tang na ki daw barit. “Kane ka jingjia kala jia hadien ba u Bitish u la wan phai ïing na ka jaka bylla. Man ka por ki ju ia mai ia nia hynrei mynta kane ka jingjia kala kylla long kaba sngew shyrkhei” la ong u nong shong shnong.
Haba kren sha ki lad pathai khubor ka Additional Superintendent of Police jong ka Chirang ka Rashmirekha Sarma u la pyntikna halor kane ka jingjia.“Ngi la shimti ia ka met iap bad la phah ban leh ia ka post-mortem. Ki Forensic experts kila leit ban peit sha ka jaka ba jia bad la lum ia ki sabut. Ia u Bitish la kem noh bad dang pynlong ia ka jingtohkit” kala ong.
Shuh shuh ka Sarma kala ong, ha kane ka por kin ym pat lah ban ong eiei halor kane ka jingjia kaba la lam sha kam ban pyniap.
