Nongstoiñ, Ïaïong 20: Ki nongkitkam bad ki dkhot jong ka Nonglang Pungsier Angler Association, ban pynneh ïa ka um bad ki dohkha doh pnat ha ka wah Tyrsung, ha ka sngi saitjaiñ ki la mih paidbah ban leit den ïa katei ka wah ha ki lai jaka.
Kum ban pynkynmaw ba katei ka synjuk kala kynjoh khat khyndai snem naduh ba la seng ïa ka bad ha kine ki khat khyndai snem, ka synjuk ka la trei shitom ban sumar ïa katei ka wah bad ban peitngor, ban ym ailad ïa ki riew shim kabu kiba thmu ban pynjot bad pynïap pathar ïa ki don um ha katei ka wah bad ki shnat jong ka.
Nalor kata ki nongïalam bad ki dkhot jong katei ka synjuk ki ju pynlong ruh ka jingpahara ïa ka shilynter katei ka wah khnang ba ki riew shim kabu kin ym ïoh lad ban ber dawai bih, siat bom, khang jar bad kiwei kiwei ki lad ban pynïap pathar ïa ki doh um.
U bah Tenjune Syiemlieh uwei na ki nongïalam ka synjuk haba ïakren bad u nongthoh khubor, u la ong ba ka thong ba ka synjuk ka don kam dei tang ban pynneh ïa ka um bad ki dohkha doh pnat ha katei ka wah bad ki shnat jong ka hynrei ka don ruh ïa ka jingangnud ban pynneh pynsah ïa ki khlaw ki btap, ki dieng ki siej, ki sim ki doh, ki mrad ki mreng bad baroh ki jingthaw kiba im ha um bad ha ryngkew ba kin neh kin sah kumba la buh beit da u Blei.
Ula iathuh ruh ba wat la ki nongïalam bad ki dkhot ki la trei shitom ban sumar ïa katei ka wah hynrei ki don pat ki khep ba ki riew shim kabu ki dang ïoh lad ban leh da kiwei pat ki lad ban pynïap dusmon ïa ki doh um doh wah.
Nalor kata u la ong ruh ba ki don ruh ki nongshong shnong kiba khat shyiap na katei ka wah, kiba ju pynpra ïa ki jaka ba ka synjuk ka la den tang na ka bynta ban ïoh khat ïa u shyiap.
Halor kane, utei u nongïalam ka synjuk u la kyntu jur ba nangne shakhmat kim dei shuh ban dang pynpra ïa ki jaka ba la den.
