Guwahati, K’lyngkot 10 : Ki Pulit Assam kila kem ia u manager jong ka krem dewiong thliew khnai ha Umrangso, Hanan Laskar hadien ka jingtwa ka par kaba jia ha ka 6 tarik Kyllalyngkot.
U Laskar u dei uba la thung da u trai ka par ban peit ia ka jingsiew bainong ia ki nongbylla tih dewiong.
Kane ka jingkem kala pyni ia ka jingiaid shakhmat jong ka jingtohkit halor kane ka jingtwa ka par, kaba pyni ia ka jingbym shngain jong ki nongtrei bad ka jingpynkhein ia ki kyndon tih par.
Shuwa kane,ki Pulit kila kem ia u Punish Nunisa haba iadei bad kane ka juh ka jingjia. Kila register ia ka ejahar hapoh ka Umrangso PS hapoh ka kyndon 3(5)/105 BNS bad kyndon 21(1) jong ka Mines and Minerals (Development and Regulation) Act, 1957.
Ka jingwad ia ki nongtrei ba shah tap ha ka um ha kane ka par ka dang iaid shakhmat. Haduh mynta, sa 15 ngut ki nongtrei ki dang sahkut shapoh ka krem kaba la shlei da ka um.
