Guwahati, Nailar 13: Khyndai ngut ki phetwir Rohingya kila shah kem noh hajan ka khappud India bad Bangladesh, na Cachar District jong ka jylla Assam ha ka sngi Ba-ar.
Katkum ka jingiathuh ki Pulit, kine ki briew kila wan rung sha India mynta la jan dap kumba 13 snem eiei.Kine kila wan poi ha Hilara Railway Station ha ka sngi Nyngkong bad kham hadien kila rieh tngen hajan ka international border.
Ha kane kakynhun ka kynthup, ia ar ngut ki rangbah, ar ngut ki longkmie, kawei ka thei samla bad saw ngut ki khynnah – kine kila sah ha kylleng ki bynta bapher bapher jong ka ri India da kiba bun ki snem ha shwa ba kin wan na Hyderabad sha Cachar.
Haba kren bad ki lad pathai khubor, u Senior Superintendent of Police (SSP) ka Cachar u Numal Mahatta u la ong ia kine kiba la shah kem la kem na ka thain Katigorah ha ka janmiet jong ka sngi Ba-ar hadien ba la buddien ia ka jingioh jingtip lyngba ki tnad syntiat.
U Mahatta u la ong, “Kine kila sah ha India la bun bun snem. Dang shen, kila wan hangne da kaba thmu ban shong ban sah noh hapoh kane ka dong ka thain.Kim shym la pyrshang ban kam sha shilliang khappud, hynrei ka kynhun jong ngi kala ioh ban bat noh ia ki ha shwa ba kin shong kin sah noh nangne,”.
Kine kiba la shah kem, kila kubur ba kila rung shapoh u pud u sam na ka ri Bangladesh mynta la jan 13 snem eiei bad kila trei ha ki jylla bapher bapher ba kynthup ha Jammu & Kashmir bad hapoh ka jylla Telangana.
“Ka tynrai jong ngi kadei na Myanmar bad kiba ha iing jong ngi ki don mynta ha Bangladesh. Namar ka jingpynshitom bein kaba dang shen ia ki nongbylla sngi, ngi la rai ban wanphai noh,” la ong u Abu Bakkar Siddiqui, uwei na kiba shah kem.
Sa u wei pat uba la shah kem, u Samsur Alam ba kila ioh ka jingiarap na ka kynhun ne (network) khaii briew kaba la wanrah ban pynpoi ia ki sha ka jylla Assam bad kila bthah ia ki ba kin shong kin sah hajan ka khappud.
“La bthah ia ngi ba ngim dei ban mih ha ka por mynsngi, hynrei ngi la leit sha iew namar ba ngim don jingbam”, u la ong.
Hadien ka jingkyndang ban pynkhuid pyrshah ia kiba wan buhai shnong bein da ka sorkar Assam, kine ki briew ba wan rung beain kila sdang ban phetwir sha ki bynta bapher bapher, hynrei la ioh ban kem ia kiba bun ngut bad la phah biang ia ki sha Bangladesh.
Shuh shuh ki don shibun ki phetwir Rohingya kiba la phet rieh ha kiba bun ki bynta jong ka ri India la ioh ban kem katba ki dang leit jingleit ban phetrieh.Hadien ka sienjam ba la shim kaba khlem poi pyrkhat ha Myanmar, ki phetwir Rohingya kila phet noh napoh ka ri jong ki bad rung sha India lyngba ki khappud.
