Guwahati, Nailar 19: Ki pulit ka Guwahati kila kem noh ia 11 ngut ki nongtrei jong ka hospital ba kynthup ia 8 ngut ki shynrang bad 3 ngut ki kynthei, halor ka jingkynnoh ba ki dawa pisa na kiba ha iing jong ki khyllung ba dang shu kha.
Kine kiba la shah kem la tip kyrteng kum – Nayanmoni, Pratima Sarkar, Prabin Deka, Lankeswar Rajbangshi, Azizur Rahman, Golok Talukdar, Chinmoy Deka, Shukla Bairagi, Ashim Deka, Alka Choudhury bad Nandu Das.
Ki kmie ki kpa ki la kynnoh ba ki nongtrei ki shim pisa ne oh dor hapdeng ₹500 haduh ₹1000 na ka bynta ki kam ba ki pynleh kum ka jingkhynniat troli bad wat ka sha na ka bynta ki nongtrei.
La register ia ka case No. 140/25 hapoh ka Bharatiya Nyaya Sanhita (BNS).
Ha kajuh ka por, ki Pulit ka Guwahati Police kila shim da ka suo motu bad kila shim khia bha ïa ki jingujor ba ki katto katne ki nongtrei kiba kham poh kyrdan ki la dawa pisa na ki nongpang ban siew kylliang ïa ki jingshakri ha ka liang ka koit ka khiah.
“La register case pyrshah ia ki nongtrei ka GMCH halor ka jingdawa pisa na ki nongpang. La kem katto katne ngut ki briew bad ka jingtohkit kaba kham bniah ka dang iaid shakhmat,” la ong u DCP ka Guwahati, u Mrinal Deka.
Na ka liang jong ka sorkar Assam ha ka sngi Nyngkong kala sdang ia ka jingtohkit kaba ar halor ka jingïap ba sngewsih jong u khyllung ba dang 15 sngi ha Neonatal Intensive Care Unit (NICU) jong ka Gauhati Medical College and Hospital (GMCH).
Na ka liang u Myntri Rangbah ka jylla Assam u Himanta Biswa Sarma, u la niew ia kane ka jingjia kum ka jingleh bal ah palat pud bad u la pynbna ruh ba la thaw ia ka kynhun tohkit ba lai ngut ki dkhot bad kumjuh ruh ki Pulit ka Guwahati kila register case da kaba pynshong nongrim na ka ejahar (FIR) ba la ujor da u kpa jong u khyllung.
U Sarma, uba la leit ban jngoh sha GMCH ha ka sngi Nyngkong u la pynpaw ia ka jingsngewsih kaba jur halor ka jingduna ha ka jingsumar ia ki nongpang .
“Watla la don ki tiar kiba biang bad kham duna ki nongpang mynta ka sngi, hynrei la buh ïa lai ngut ki khyllung ha kawei ka jingthiah. Kane ka dei ka jingbym shimkhia kaba ym lah ban pdiang.La dep sospon noh ïa ka nurse kaba don ha ka kam katba dang ap ïa ka jingtohkit.Ki bor pynïaid hospital ki dei ban pynmih ïa ka jingpanmap kaba pura sha ka longïing kaba la duh noh,” ong u Sarma.
