Guwahati, Nailur 5: Ka Tnad Crime Investigation Department (CID) kala kem biang sa khyndai ngut ki Pulit kynthup u Heh Pulit IPS na Balajia District ka Assam hadien ba uwei u Nongkhaii hehspah ula kynnoh ba u shah dawa pisa ha kine ki Pulit.
Une u Nongkhaii ba kyrteng u Rabiul Islam, ula kynnoh ba kine ki Pulit kila kem bad set khlem dawa ia u bad hukum ruh ba un siew haduh T. 2.5 klur sha ki lem kumta kin siat iap ia u haba byrngem ruh ba kin pynksan ia kane ka kam da kaba kynnoh ba u donkti bad ki kynhun lehnoh ka Pakistan bad Bangladesh.
Ha ka ujor, u Islam ula ong ba ka jingbyrngem kala wan na u briew uba kam ialade kum u “encounter specialist”.
Ka khubor ka iathuh ba ki Pulit ka Assam kila kylla long ki riew runar da kaba donkti ha kiba bun ki kam bymman.
Ka Tnad Pulit ka Assam ha ka sngi Nyngkong, kila kem ia u Siddhartha Buragohan, u IPS officer ka 2014 batch bad uba dei u Superintendent of Police ka Balaji hashuwa ba un shah pynkynriah kam arsngi sha ka Police Headquarter.
Nalor une u Heh IPS, ki Pulit kila kem ruh ia u Deputy Superintendent of Police (HQ) Pushkal Gogoi, Additional Superintendent of Police Gayatri Sonowal, u kurim jong ka Subhas Chander, Sub-Inspector Debajit Giri, bad constable Injamamul Hassan.
Ki lai ngut kiwei pat kiba shah kem ki dei u Kishore Baruah bad ki arngut ki Pulit ba niah kali Nabir Ahmed bad Dipjoy Kalita.
