Guwahati, Nohprah 19: Ki Pulit ka Jylla Assam haka jingiatreilang bad ki Pulit ka Jylla West Bengal bad Kerela kila lah ban lap iaka kawei ka buit treikam ki kynhun lehnoh jong ka kynhun Jihadi Global Terrorist Organization (GTO).
Kane ka jinglap ki bor Pulit iaka GTO kadei hadien ka khynra ïa kaba la ai kyrteng daka Operation Praghat bad ha kane ka jingkhynra, ki Pulit kila ioh kem 8 ngut ki lehnoh kynthup ia uwei u nong Bangladesh.
Kine kiba shah kem ki kynthup u Md. Sad Radi (ba khot sin u Md. Shab Seikh) na Bangladesh uba don ka jingiadei bad ka Ansarullah Bangla Team (ABT), u ba trei kam ha India khlem ki kot ki sla, u Minarul Sheikh (40 snem) u khun jong u Imajuddin Sheikh na ka shnong Magura, Murshidabad district, West Bengal, u Md. Abbas Ali (33 snem) u khun u Lt Arsad Ali na ka shnong Harihar para, Murshidabad district West Bengal, u Nur Islam Mandal (40 snem) u khun jong u Usman Goni na ka shnong Joypur Namapara kaba don ha Elaka Kokrajhar Assam, u Abdul Karim Mandal (30 snem) u khun jong u Toffajjal Mandal na ka shnong Joypur kaba hap ha Kokrajhar Assam, u Mojibar Rahman (46 snem) u khun jong u Sabaruddin Seikh na ka shnong Bhodeyaguri kaba don ha Kokrajhar district jong ka Assam, u Hamidul Islam (34 snem) u khun jong u Taleb Ali na ka shnong Joypur Namapara kaba hap ha Kokrajhar district jong ka Assam bad u Enamul Hoque (29 snem) u khun jong u Md. Amjad Ali na Hatipota Dhubri district Assam.
Ka STF Assam hadien bala ioh pdiang iaka FIR bala register hapoh ki kyndon 61(2)/147/148/149 ba la pule ryngkat bad ka kyndon 10/13/16/18/18B/20. UA(P) Act 1967 bad kyndon 12 (1)(a) jong ka Passport Act 1967 kala sdang ïa ka jingkhynra hapoh ka jingpeit bniah jong u heh ka STF u Partha Sarathi Mahanta.
Ha ka miet jong ka 17-18 tarik u Nohprah, ka STF kala pynlong ha kajuh ka por ïa ki jingkhynra ha ki jaka ba don ki kynhun lehnoh Jihadi kum ha Kerala, West Bengal bad Assam.
Na kine ba shah kem la kurup ïa ki kot ki sla bad Mobile Phone bad la pynngat mukotduma iaki ha ryngkat ki sakhi sabut.
La ioh jingtip ba kine ba shah kem ki don bynta haka jingïakren sha shiliang pud bad ki kynhun ba don ha Bangladesh & Pakistan ha kine ki ar bnai ba la dep.
.){kind=link}