Shillong, Nohprah 19: Ka Meghalaya hynne ka sngi Palei kala pynrem ia ka Delhi da 2-0 ha ka jingiakhun ia ka Senior Men’s National Football Championship jongka Santosh Trophy 2024-25 kaba la long ha Hyderabad.
Ha kane kaj ingiakhun ha ka Round kaba 3 ha ka Group B, ka Meghalaya ka donkam bha ban jop bad ha ka kylla miet u Donlad Diengdoh ula thep 2 kol ha ka minit kaba 49 bad 51 bad kane kala pynthikna syndon ia ka Meghalaya ban jop pyrshah ia ka Delhi.
Ka Meghalaya kala iakhaid da 2-2 bad ka Tamil Nadu bad dang ha kine ki khyndiat sngi kala shah pynrem ha ka Kerala da 1-0.
U Coach ka Meghalaya u Bah Hering Shangpliang ula pynmih bujli tang ia uwei u rangialehkai hynne ka sngi, ha kaba u Kevin Rymbai ula mih bujli ha ka jaka jong uFullmoon Mukhim uba la don hapdeng ka jingshitom katba u Vice-Captain u Damanbhalang Chyne ula shimti noh kum u Captain ha kane ka jingiakhun.
Hadien ba kine ki ar tylli ki kynhun kim shym la lah ban thep kol ha ka kylla step bad ka jingiakhun kala kut ha ka jingiakhaid hynrei mar ia sdang ka jingialehkai ha ka kylla miet u Donlad ula thep 2 kol da kaba shut ia ka bol kaba u nongap kol ka Delhi ym shim la lah ban leh eiei.
Ka Delhi kala ioh ia ki katto katne ki kabu, hynrei kam shym la lah ban thaw pyrthei eiei khamtam haba u nongap kol ka Meghalaya u Siwel Rymbai ula pyni ia ka jingtbit ka jongu ha kaban iada ia ki bol ban ioh rung shapoh kol.
Kane kadei ka sien kaba nyngkong eh ia ka Delhi ba kam shym la lah ban thep kol ha kane ka jingiakhun.
Ki 4 tylli ki kynhun kiba wan shakhmat ha ka Group kin ioh rung sha ka Quarterfinal bad ka jingjop ka Meghalaya kala pynlong ia ka ban don ha ka kyrdan kaba 3 da kaba ioh 4 point, katba ka Kerala kala ialam nakhmat eh da kaba ioh khur 9 point hadien ba kala pynrem ia ka Odisha 2-0 hynne ka sngi.
Ka Delhi watla kala mad ia ka jingrem hynrei kala neh hi ha ka kyrdan kaba 2 da kaba ioh khur 6 point, katba ka Odisha kaba don hadien jong ka Meghalaya kala kamai 3 point, ka Tamil Nadu kala ioh 1 point bad ka Goa kam pat ioh ban kamai shi point ruh.
Ka Meghalaya kan iakhun pyrshah ia ka Goa ha ka sngi u Blei ha ka por 2:30 mynsngi.
