Guwahati, Rymphang 25: Ki riew runar ki bym lah ban ithuh dur satia ki la pynpra bad jynrat ïa u mot jong u Myntri Rangbah duh ba nyngkong jong ka Ri India, u Jawaharlal Nehru, da kaba pyndonkam da ka kor machine ha Poilapool, Lakhipur sub-division ka Assam, Cachar district.
Katkum ki khubor ba la iohlum, la ong ba katei ka jingjia ka la jia ha ka miet jong ka 23 tarik u Rymphang ha saw lad (four-way junction) kaba don ha ka thain Poilapool.
La kynnoh ba ki dur khih (video) na ki kor CCTV ki pyni ba la pyndonkam da ki mashin kiba heh ban pynhiar ia u mot shwa ban buh ia u ha ka kali bad rah noh ia u.
Ia une u mot la pynieng ha ki snem 1990 da u myntri barim ka sorkar Assam uba long ruh u MLA ka thain u Dinesh Prasad Goala ha ka lad Poilapool kaba dei ka jaka khaii kaba kongsan ha katei ka thain.
U President barim ka Silchar District Congress u Pradip Kumar Dey ha ryngkat ki nongtrei ka party ki la ujor da ka FIR ha Lakhipur Police Station bad dawa ban kem mardor na ki pulit.
Da kaba khot ia kane ka jingleh “kaba dei ban pynrem jur”, ki nongialam ka Congress ki la buh jingkylli kumno lah ban pyndonkam ia ki tiar kiba heh ha ka jaka paidbah.Ki la kynnoh ba katei ka jingjia ka paw ba la thmu lypa bad ki dawa ban leh da kaba tyngeh pyrshah ia kiba donkti.
“Ngi pynrem ia kum kane ka jingjia bad ngi dawa ban kem mardor ia ki nongleh kam sniew kiba la pynjulor ia u mot.Baroh ki tip ba hapoh ka jingbthah jongno la weng ia u mot bad kaei kaba jia ha Lakhipur.Ha ka miet jong ka 23 tarik u Rymphang, ki riew sniew ki la pyndonkam da ki machine ban weng ia u mot.Kane ka pyni ia ka jingmut jingpyrkhat jong ki briew kiba donkti”, la ong u Dev.
Ki pulit kim pat lah ban ithuh ia utei u briew uba shah kynnoh, bad ka jingtohkit kaba bniah ka dang iaid shakhmat.
