Guwahati, Jylliew 18: U Himanta Biswa Sarma uba dei u myntri rangbah ka jylla Assam, ha ka sngi Balang u la takrain tyngeh kylla ia u nongialam ka Congress Rahul Gandhi, halor ka jingkynthoh ba dang shen halor ka jingpyniap masi bad ruh ka jingpynjakhlia ia ka temple da kaba ong ba kane ka long kum ka ‘jingber Bih’ bad kaba pynmong ia ki riew ngeit Hindu.
Haba kren bad ki lad pathai khubor, u Sarma u la ong, “Kane ka pyni ia ka jinglong tynrai jong u Rahul Gandhi ha ka jingmut jingpyrkhat. Lada bret ki Hindu ia ka doh, kan dei da ka Doh Sniang, ym dei ka Doh Masi, Balei ngin pyndonkam da ka Doh Masi? Kum kine ki jait jingkynthoh ka pyni ia ka jingmut ba sniew bad kaba shah liang.”
U Sarma u la ong, “Lada ia ka khlieh Masi la lap na temple, shaei ka met ba sah jong ka doh? Lada ka BJP ne RSS ne kino kino ki kynhun niam Hindu kila leh ia kane, kila dei ban bam lut ia kaba sah? Kaei kaba u Rahul u ong? Ba ki Hindu ki pyniap Masi bad ieh ia ka khleh ha temple bad kum kine ki jait jingkynthoh ngin ym lah ban pdiang”.
U Sarma u la ong, “Baroh kiba shah kynnoh donkti ha kaban bret Doh Masi ha temple ha Assam la kem ia ki bad baroh ki dei tang na kawei ka jaitbynriew. Hynrei kane ka jingkynnoh u Rahul ba dei ki Hindu kiba la ot ia ka khlieh Masi bad bam pat ia ka don kaba sah, kane kadei ka jingmut ba sniew bad kaba thmu ban pynjah burom.”
U Myntri Rangbah ka Assam u Dr. Himanta Biswa Sarma ula iathuh ba palat 30 ngut ki briew la dep ban kem ha kaba iadei bad kane ka jingjia ba dang shu jia shen ha Dhubri ha kaba ia ka khlieh Masi la lap na kawei ka jaka ba kyrpang bad kane ka wanrah ia ka jingia kynad hapdeng ki ar jaitbynriew, Shuh shuh, sa san ngut ki briew la kem ha kaba iadei bad kane kajuh ka jingjia ha Lakhimpur district.
