Guwahati, Jymmang 20: Ha kawei ka jingkhynra kaba heh, ki pulit ka Jorhat kila ioh ban pyllait haduh 24 ngut ki lanot na ka kam khaii briew bad kine baroh kidei kiba shong ba sah ha ki kper slasha na Rupa kaba hap ha West Kameng district jong ka jylla Arunachal Pradesh.
Kane ka jingioh ban pyllait im ka long ha ki ar bynta kaba kynthup jong ka jingioh ban pyllait na ki kti jong kine ki runar ha ka 15 bad ka 17 tarik mynta u bnai Jymmang kaba hap hapoh u pud u sam jong ka Mariani Police Station ha Titabar sub-division.
Ki briew kiba la shah kem halor kane ka jingkhynra ki kynthup ia u Lakshman Dutta (59) snem ka rta uba dei na Sonowal Seuji Gaon bad u Pitka Majhi (31) snem ka rta uba na Dahingeapar Tea Estate.
Kine ki lanot kila shah pynbiej ha u bnai Iaiong ha ryngkat bad ki jingkular thok ban ai kam ha Tezpur, haba ki don ha Arunachal, kila shah pynbor ban trei kum ki nongbylla sngi khlem jingsiew kaba ki hap ban trei naduh ka por 6 baje mynstep haduh 5 baje bad khlem da shah ban pyndonkam phone ha ryngkat bad ka jingshah byrngem.
Kawei na ki lanot kala pynpaw, “Ngi la shah pyndih da ki jingdih kaba la pynlong ia ngi ban ym tip briew shuh ha ka jingiaid lynti ka jong ngi”.
Kane kala paw pyrthei hadien ba jah ka Gauri Sahu, kaba ia kaba la ujor ha ka 27 tarik u bnai Iaiong bad kane ka kaiphod ka la pynlah ia ki pulit ban buddien bad la ioh pat ban pyllait noh ia kine ki lanot.
Ka Superintendent of Police ka Jorhat ka Shwetank Mishra kala pyntikna ba kine ki nongbylla wat lada ki mut leit sha Tezpur hynrei ia ki la shah ialam noh Arunachal Pradesh instead. Halor kane phra ngut ki lanot la ioh ban pyllait bad la wan ialam noh sha Assam ha ka 15 tarik u bnai Jymmang bad bud pat sa ka kynhun kaba ar.
Ka tnad Anti-trafficking kila pynpaw ba kane ka kynhun ka trei kam bha ha Assam bad khamtam eh ha ki jaka ba rep slasha, da kaba peit kliaw ia ki briew bad khamtam eh ia ki kynthei da kaba tyrwa kam sha ki, tang ban shu die ia ki ne pynbor ban trei kum ki nongbylla sngi ne ban pyniaid iew sha ki kam awria.
Ki pulit ki dang pynlong ka jingtohkit ban dang ioh jingtip shuh ia ki lanot bad kumjuh ruh ban pynkut shi syndon ia kane ka kam khaii briew ne ka trafficking network.
