Guwahati, Rymphang 19: Ha shuwa ban sdang ka Assembly election hapoh ka jylla Assam mynta u snem 2026, ka Congress ka la pynjur ia ka jingpynkhreh bad ka chairman jong ka AICC Screening Committee Priyanka Gandhi Vadra ka la pynlong ia ka jingialang kaba kongsan ha Guwahati ha ka sngi Palei bad ki nongialam ka seng, ki MLA, bad ki nongtrei na kylleng ki jylla.
Ka Priyanka Gandhi ka la leit sha ka jingialang bad ki president jong ka Congress block kiba la wan na ki jaka bapher bapher jong ka Assam.Katkum ki tyllong khubor na ka Congress, la ong ba ha kane ka jingialang la wan ban iashim bynta da palat 300 ngut ki Block President.
Haba kren sha ki lad pathai khubor hadien ba la wai ka jingialang, ka Priyanka Gandhi ka la ong ba ka jingphet seng ka long kaba ju jia shwa ka elekshon, hynrei ka la ban jur ba ka seng ka dang iai long kawei bad ka kut jingmut ban iakhun tyngeh ia ka elekshon.
“Shwa man la ka elekshon, ki don beit ki briew kiba leit sha ne sha tai bad kane ka jia ha man la ki election bad ngi iakhun lang ha ka election bad ka party baroh kawei ka iakhun lang ia ka election.Baroh ngi pyrshang ban ialeh ia kane ka elekshon kaba long kum ka thma bad ki nongiakhun bat bit jong ngi ki dang ki dang ieng skhem bad ka party jong ngi.Ngin iakhun tyngeh bad ba ngin jop,” ka la ong.
