Assam | Iakren ka Sorkar bad AASU ban pynim biang ia ka jingtreikam ka Assam Accord

Guwahati, Naiwieng 23: Ka sorkar Assam ha ryngkat bad ka All Assam Students’ Union (AASU) ha ka sngi Saitjain kila pynlong ia ka jingialang ba kongsan bha ban bishar bniah ha kaba iadei bad ka jingpyntrei kam ia ka Assam Accord ia kaba la pynshong nongrim katkum ka jingai jingmut jong ka Biplab Kumar Sarma Committee.

Hadien jong ka jingialang, u President ka All Assam Student Union (AASU) u Utpal Sharma u la pyntip sha ki lad pathai khubor ba ka committee kala aiti ia kiba bun ki jingai jingmut, kiba kynthup ia 40 tylli kiba hap hapoh ka jingpeit jong ka sorkar jylla bad 12 tylli ki kiba don kam ia ka jingiatrei lang hapdeng ka sorkar kmie bad ka sorkar jylla.

“La don ka jingïathir halor ki mat ba lah ban leh kiba ïadei bad ka Sorkar Jylla kiba kynthup ïa baroh 52 tylli ki jingai jingmut bad laa pdiang ruh ïa ki rai, bad la pynkhreh ïa ka roadmap na ka bynta ban pyntreikam ia ka,” ong u Sharma.

Ka AASU ka la tyrwa ban thaw ia ka Cabinet sub-committee ban buddien ia ka jingiaid shaphrang jong kine ki 52 tylli ki jingai jingmut.Ia katei ka kynhun yn pyniaid da u myntri ba peit ia ka Assam Accord Implementation, ha kaba u Chief Secretary un long kum u dkhot.

“U Myntri Rangbah ka Jylla ul a pdiang ïa ka jingai jingmut bad pynthikna ruh ba kum kane ka committee yn sa thaw bad sa pyntip shen,” la bynrap biang u Sharma.

Shuh shuh u la pynpaw, kiwei de ki 15 tylli ki jingai jingmut ki don ha ka kti jong ka sorkar kmie, bad ki don katto katne tylli kiba hap ban ia don bynta ha ka constitutional amendments. Na ka liang jong ka AASU kala dawa ba dei ban don ka tripartite ne ka jingiakren hapdeng ka sorkar kmie, sorkar jylla bad ka AASU – ka jingtyrwa kaba u Myntri Rangbah ka Jylla u la mynjur ban buddien bad ka sorkar kmie.

Ka AASU kan sa ia kren bad ki lad pathai khubor ha ka 24 tarik u Naiwieng ha ka press conference kaba la pynbeit ban pynlong ha ophis trei kam jong ka ha Uzan Bazaar.

Ki heh ophisar kila pyntikna ruh ba ka Cabinet sub-committee kaba rim ia kaba la khlieh da u Myntri sorkar u Atul Bora — kaba la pynlong ïa ki jingïakren hynniew sien halor ki kyndon ba kongsan jong ka Assam Accord, kynthup ïa ka jingpynthymmai ïa ka NRC bad ka jingïada na ka jingshlei um bad ka jingtwa khyndew — ka la pyndep ïa ka kam jong ka bad ka la aiti ïa ka kaiphod ba khatduh sha u Myntri Rangbah ka Jylla. Ia kane ka kaiphod yn sa sam paidbah ha ka press conference jong ka AASU ba kan sa long.

Ha kajuh ka por, ka AASU kala pynpaw ia ka jingsngewkhia ha kaba iadei bad ka jingia kren kaba dang iaid ha kaba iadei bad ka report jong ka Tiwari Commission halor ka election 1983, da kaba kdew ba ki trai ri trai muluk ki la boycotted ïa ka elekshon, da kaba kdew ba ki don ki briew kiba suba ba ki ioh rung be-aiñ ha ka thup thep vote. Ka seng ka la kynthoh ba ka report Tiwari ka pynpaw tang ïa ka jingïohi jong ka sorkar bad kam kynthup ïa ki jingkren jong ki nongïakhih bad ki paidbah nongshong shnong.

Da kaba pynpaw ïa ka jingdonkam katkum ka jingïathuh kaba ïahap, ka AASU ka la aiti ïa ka kaiphod jong ka Mehta Commission — ba la lum lang da ki nongïaleh laitluid bad kaba don ïa ki jingmut jong ki nongiakhih bad ki nongshong shnong — da kaba kyntu ba ïa baroh ar tylli ki kaiphod dei ban buh mar katjuh ha ka Ïingdorbar na ka bynta ka jingïakren kaba khlem shah liang. La iathuh ba u myntri rangbah ka jylla u la mynjur ia katei ka jingkyrpad.

Haba kren sha ki lad pathai khubor, u myntri sorkar u Atul Bora u la pynkynmaw biang ia ka jingsam ia ki jingai jingmut — 40 tylli hapoh ka Jylla, bad jan 15 tylli hapoh ka sorkar kmie, bad 12 tylli kiba donkam ia ka jingiatreilang hapdeng baroh ar. “La pynlong ia ka jingiakren kaba hynniew sien kynthih bad mynta ka committee ka la aiti ia ka kaiphod sha u Myntri Rangbah ka Jylla”, u la ong.

Da kaba khot ia ka kum ka “historic day”, u Bora u la bynrap, “Ka Assam Movement, kaba la sdang da ka AASU ha u snem 1979, ka la ïai bteng haduh ban da soi ïa ka Assam Accord ha u snem 1985. Wat hapdeng ki thong jong ka jingïakhih, ki sorkar kiba mynshuwa kim shym la shim khia ïa ki sienjam kiba don jingmut. Ngi kyrmen ba ngin sa lah ban pynurlong ïa ka thong ha ki por ban wan.”