Guwahati, Nailur 25: Palat daki spah ngut ki kmie ki kpa ki la pynlong ïa ka jingïakhih ha ka skul Carmel ha Rani, Assam hadien ba la pynban da ka doh masi ïa ki khynnah skul Hindu hapoh ka hostel.
Ki kmie ki kpa kiba dawa ba ki bor pyniaid skul khatam u Principal udei ban shim ka jingkitkhlieh halor kane.
Katkum ka khubor, la iathuh ba ha ka 19 tarik Nailur, ki khynnah skul Hindu kiba pule klas 7 ki la shah pynbor ban bam doh masi ha ki katto katne ki khynnah skul na Manipur kiba dei na ka Kuki Community ha ka por ba ki bam ja skul.
Kane ka jingjia ka la paw pyrthei hadien ba ki khynnah kila pyntip sha ki kmie ki kpa bad ki kmie ki kpa jong ki khynnah kila kynthoh tyngeh pyrshah ia ki bor pyniaid skul daka ba kynnoh ba ki la pyrshang ban buhrieh ia katei ka jingjia.
Naka liang ki bor pahara CRPF ki la poi ha kane ka skul ban pynbiang ia ka shongsuk shongsain haka jingdon lang ki ophisar na Palashbari Circle bad ki pulit.
Ki kmie ki kpa kiba iakhih kila ïalum lang habar jong ka skul, daka ba pyrta kum “Kem ïa u Principal” bad “Down with Kuki Manipuris.”
Ki la kynnoh ba u Principal u la pyrshang ban buhrieh ia katei ka jingjia bad ban pyntieng ia ki samla pule Hindu.
Ia ka ejahar kaba pura la ujor da ki kmie ki kpa ha thanat Rani.
Ki kmie ki kpa ki la pynpaw ruh ïa ka jingsngewkhia halor ki kyndon ba jem jong ka skul bad ki la kynnoh ba ki jingjia shah lehbeiñ, kynthup ïa ka jingshah shoh jong ki khynnah skul, ki ju jia man ka por.
Ki la kynthoh ia ka skul daka ba kynnoh ba kila iaid k ia ki kyndon jong ka Sorkar kaba la buh jingma ia ka jingbha jingmiat ha ka pule puthi jong ki khynnah skul na ki thain nongkyndong.
“Hadien ba ki Kuki-Manipuri bad ki Naga ki la shim Admission ha kane ka skul, ka jingeh ka la sdang. Ki la sdang ban lehbein ia ki khynnah skul jong ngi. Mynta ki la ai doh masi ia ki khun jong ngi. Ngim shah ia kum kane ka kam. U principal jong ka skul u don ka jingkitkhlieh na ka bynta ka jingjia,” la kynnoh uwei napdeng kiba iakhih.
U la ong, “Ka jingjia ka la jia ha ka 19 tarik Nailur haka ba u khun jong nga u la wan phai na skul, u la iathuh ia ngi ba ma u ryngkat bad kiwei pat ki khynnah skul ki la ioh bam doh masi”.
“Ka pynmong ia ka jingsngew niam jong ngi. Ka skul kadei ban beh mardor iaki khynnah skul Kuki-Manipuri” u la ong.
Lah ban kdew ba kane kadei ka sien ba nyngkong ba la mih ki jingkynnoh kiba jur pyrshah ia ka skul Carmel, kaba la shah bishar bniah na ka bynta ki mat bapher bapher ha ki por ba la dep.
