Guwahati, Naiwieng 10: Daki spah ngut ki nongtrei Accredited Social Health Activist (ASHA) jong ka Jylla Assam hynne ka sngi kila mih paidbah ban iakhih ha Chachal Guwahati ban dawa pynurlong iaki jingdawa kynthup ban siew tulop man u bnai, ban pynduna ka kynta treikam bad kiwei kiwei.
Ha kane ka jingiakhih, ki ASHA kila dawa ba dei ban siew T. 15,000 ka tulop man u bnai bad ban pynduna ka kynta treikam jong ki.
Ki tyllong khubor ki iathuh ba ki nongtrei ASHA kila thoh bun sien shaka sorkar Assam bad ha ki ophisar ka tnat ka koit ka khiah ba pynsngew iaki jingdawa jong ki bad kila kynnoh baki ophisar ka sorkar Assam kila kular ban pynurlong iaki jingdawa jong ki hynrei haduh mynta kim shym la shim kano kano ka sienjam ban pynurlong.
Lah ban kdew ba ki ASHA ha Assam kila ioh ka bai nong kumba T.3000 ha kaba kila pynpaw ba kane ka dap iaki ban pynbit pynbiang hala ki ïing ki sem.
