Guwahati, K’lyngkot 08 : Hadien ki bos elektrik, mynta ka Assam kala pyllait paidbah ia ki e-bikes ban ai ka jingshakri ia ki paidbah ka nongbah Guwahati ha ka leit ka wan.
U Myntri ka tnad Transport ka Assam Paramal Suklabaidya ula pyllait paidbah ha ka sngi U Blei ia kine ki “Electric Bike Taxi and delivery services” lyngba ka “Baayu ASTC App.
Kane ka dei ka App ba nyngkong eh hapoh ka Ri ba dei beit thik tang ia ka e-bike ha Guwahati.
Kane kan iarap ban pynduna ia ka jingbam petrol, pynduna ia ka jingpynmih tdem, pynduna ia ka jingdheng kali bad khamtam eh ban ai kamai jakpoh ia ki briew.
Ka Jylla kan sa sakhi ruh ia ka jingwanrah ia ki bike taxi bym pynmih tdem, ia kaba la kyrshan da ka NITI Aayog ‘Shoonya’ (Zero pollution mobility) campaign, “Baayu – Clean Air Movement”.
