Guwahati, Naitung 15: U Myntri Rangbah ka jylla Assam u Himanta Biswa Sarma ha ka sngi Ba-ar, u la pynpaw ba ka sorkar kala dep ban pynkhuid haduh 40,000 acres ne 160 square kilometre ka jaka bala shah wan klun jujor, ha ka jingkyndang ia ki Iing ki sem bala pynlong ha kine ki khyndiat sngi bala leit.
Haba kren sha ki lad pathai khubor, u, Sarma u la ong, “Haduh mynta ngi la dep ban pynkhuid haduh 40,000 acres ki jaka ba la shah klun ne shah kyntur, bad kiba kham bun ki jaka kidei jong ka Chandigarh (kaba don kumba 12 sq km). Kine ki jaka kiba la dep ban pynkhuid bad ki kynthup ia ki jaka jong ka tnad forest reserves, jaka bam phlang ki jingri jingdup, ki jaka ki riewlum bad kiwei pat ki jaka jong ka sorkar,”.
U Sarma u la ong, “Lada ngi iohi ia ka jingsdang ka jingkylla ha ka jingbun briew ha lower bad ha ki bynta ki jaka pdeng ka Assam, ngi la dei ban pynsangeh, hynrei ngim shym la iohi ia kane ka jingkyntur bad hadien kane kala kylla bad ngim shym la lah ban khanglad. Mynta kila sdang sa ha ki bynta jong ka upper Assam, bad ia kane la sdang na Kaziranga, hynrei nga la lah ban pynsangeh ia kane ka jingthmu.Mynta kila leit sha kiwei pat ki constituency bad na ki sa sha kiwei pat,”.
“Hadien 20 snem, phin sa iohi ha man la ki constituency ba ki don kiba la ioh ban thep vote kumba 40 per cent bad shisien ba kila kylla long kiba ioh bor ha ka sain pyrthei bad hangta ki nongialam ka thain kin ym ai lad ban pynkynriah ia ki bad hadien ki briew kiba dei na Assam kin sa duh noh ia la ka jinglong trai,”la ong u Sarma.
U Myntri Rangbah u la pynpaw ba ki don shibun ki kyrteng jong kine ki briew kiba la shah pynkynriah kiba la shah pyndam noh na ka voter list. “Ka jingpynthymmai ia ki kan ym lah ban pynsangeh ha Assam namar ba ka jingioh lang trai shnong ne ki nong shong shnong ba pura la pynshong nongrim katkum u snem1971, ym ha u snem 1951 kumba leh kiwei ki jylla jong ka ri,” u la ong.
