Guwahati, Nailar 3: U nongialam ka liang pyrshah hapoh ka jylla Assam, Debabrata Saikia u la ia kynduh ia u Myntri ka Sorkar Pdeng Jyotiraditya M. Scindia ban dawa dohkit CBI halor ka jingkynnoh ba ia ka welfare home kaba la mang na ka bynta ki khunswet ha Haflong la pynkylla bein sha ka hotel kaba heh.
Ha ka shithi ba la thoh sha u Scindia, u Saikia u la kynnoh ba ïa ka projek—kaba la mang hapoh ka Non-Lapsable Central Pool of Resources (NLCPR) ha ka jinglut kaba long ₹3 klur—kadei thmu kum ka iing na ka bynta ki khunswet, bad kumjuh ruh na ka bynta ki quarter bad ka vocational training centre. Hynrei mynta la kynnoh ba kane ka jaka kala pynkylla kum ka hotel.
Ïa ki jingtei la aiti da ka tnad PWD Haflong Building Sub-Division sha u Deputy Director jong ka tnad Social Welfare ha ka 13 tarik u Nailar 2021. Tang katto katne taiew shwa kata, ha ka 26 tarik u Naitung 2021, u Myntri Rangbah ka Jylla u Dr. Himanta Biswa Sarma u la plie paidbah ia kane ka project.
Da kaba kynnoh ba ïa kane ka jingleh kum ka “jingpynduh ne ka jingkheiñ ïa ka jingshaniah jong ki paidbah”, u Saikia u la dawa ym tang ïa ka jingtohkit jong ka CBI hynrei ban pynlong ruh ïa ka jingtohkit kaba bniah da u Comptroller and Auditor General (CAG) jong ka Ri India.
Shuh shuh u la kynnoh ba ka jingpyndonkam da kiwei pat ki lad ïa kane ka jaka ka lah ban ngat hapoh ki kyndon jong ka aiñ Bharatiya Nyay Sanhita, 2023—khamtam eh ka kyndon 61 (criminal conspiracy) 198 (public servant disobeying law causing injury),bad 318 (cheating).
