Shillong, Nailar 03 : Ki Pulit ka Jylla, kila ioh kem ia arngut ki samla khaii droks kiba dei na East Khasi Hills District ha ryngkat u droks heroin ba 23.24 gram bala thep ha ki artylli ki synduk sabon.
Kine ki arngut ki kyrteng u Bankyrmen Jyrwa bad u Reobenezer Pyngrope. Ia kine ki arngut la kem ha ka sngi U Blei.
Ki Pulit ki iathuh ba ia kine ki arngut la kem na ka bos MTC katba ki dang wan phai na Silchar sha Shillong, ha ka jingtalasi kaba la pynlong kat kum ki jingtip ba kila ioh lum.
Ka jingtalasi kaba sani bha kala lam sha ka jingioh kurup ia une u heroin bad kumta hi, la kem bad la rah noh ia ki sha thanad ban tohkit.
Ki Pulit kila register case ia kine ki briew hapoh ka Narcotic Drugs and Psychotropic Substances (NDPS) Act, bad ki dang pyrshang mynta ban lah pynithuh bad iohkem ia u nongshalan ba na Assam.
