Guwahati, K’lyngkot 22 : Ka Forum jong ka Liang Pyrshah, kala dawa ia u Himanta Biswa Sarma ba un hiar shuki noh kum u Myntri Rangbah ka Assam halor ka jingkynthoh ia ka Bharat Jodo Nyay Yatra ha Sonitpur District.
Haba iakren bad ki lad pathai khubor ha Dispur Press Club hynne ka sngi Nyngkong, ka Liang Pyrshah kala pynrem jur ia ka jingkhang ia u Rahul Gandhi ban rung sha Srimanta Sankardev Satra hynne ka sngi Nyngkong.
Ka Liang Pyrshah kala ban jur ba ka jingkynthoh ia ka Nyay Yatra ka pyni ia ka jingbym lah jong u Myntri Rangbah ban tehlakam ia ka shongsuk shongsain, haba suba ka jingthombor ka dei kaba la suhbuit bad bala plan bha.
Lah ban kdew ba u Nongialam ka Congress Rahul Gandhi ula shah khang ha ki bor District ba un leit jngoh ia ka Sri Sri Sankar Dev Satra Temple ha Bordua hynne ka sngi Nyngkong. U Gandhi ha ryngkat ki nongialam ka Congress kila shah khang lynti ha Haiboragaon bad ym shym la lah ba kin iaid shakhmat.
Une u President barim ka Congress u don jingthmu ban pan ia ka jingkyrkhu naka Blei shuwa ban sdang ia ka Bharat Jodo Nyay Yatra hynne ka sngi.
Haba thalain ia kane ka jingkyntait ai jingbit ia u Rahum ba un leit sha ka Temple, ka Mahila Congress kala pynlong ia ka jingiashong kyllain mungor bad la wan iashimbynta ruh da une u Nongialam barim ka Congress.
Hadien katto katne por, la pyntip ba ki bor Sorkar kila ai jingtip ba u Rahul Gandhi ula lah ban leit sha kane ka Temple ha ka por 3 baje janmiet.
