Guwahati, Nailar 20: Ka liang pyrshah jong ka Assam ki la ther ïa u Myntri Rangbah ka Jylla u Himanta Biswa Sarma halor ka jingsngap jar jong u hadien ki jingjia shah thombor bad pynjulor ïa ki kali ba la register da ka Assam bad ki briew na kane ka jylla da ka Khasi Students’ Union.
Ki nongialam ka liangpyrshah ki la buh jingkylli ia u Sarma kum u convenor ia ka North East Democratic Alliance (NEDA), da kaba kylli balei ba um shym la sdang ia ka jingiakren bad ka sorkar Meghalaya ban pynduna ia ka jingkulmar bad ban pynthikna ia ka jingshngain jong ki nongleit nongwan na Assam.
U nongïalam ka Asom Jatiya Parishad u Lurin Jyoti Gogoi u la kynnoh ba ki nong shong shnong ka Assam bad ki kali kiba la register ha Assam ki shah thombor ha nongbah Shillong bad buh jingkylli ïa ka jingsngap jar jong u Myntri Rangbah ka Jylla.
“Hangno kala don ka jingsdang na ka bynta ka jingiakren bad ban pynjem ia ka jingeh?” U Gogoi u la kylli, da kaba kynthoh ba ka jingbym lah jong u convenor ka NEDA ban tuklar ka long kum ka jingbymlah jong ka jinglong nongialam.
Sa kawei pat ka nongialam ka liangpyrshah na ka Congress, ka Mira Borthakur ka la buh jingkylli balei ba ki nongniah kali bad ki nong jngohkai pyrthei na Assam ki ju iakynduh jingeh bunsien haba ki leit sha ki jylla ba marjan jong ka dong shatei lam mih ngi.
“Hadien ba u la kam bunsien ba u dei uwei na ki Myntri Rangbah ba khlaiñ tam jong ka ri India, balei ba ki nongñiah kali bad ki nong jngohkai pyrthei na Assam ki ju ïakynduh ïa ki jingshah thombor ha ki jylla ba marjan kum ka Meghalaya, Arunachal Pradesh, Nagaland bad Mizoram?” ka la ong.
Ka Borthakur ka la buh jingkylli ruh mano ban siew bai lutksan ïa ki trai kali halor ka jingjulor ba la kynnoh bad balei ka sorkar Meghalaya kam shym la lah ban pynthikna ïa ka jingshngaiñ jong ki briew kiba ïaid lyngba kane ka jylla.
Ka la dawa ba u Sarma u dei ban tuklar hapoh 24 kynta ban pynbeit ia katei ka jingeh bad ban pynthikna ban siew bai lutksan ia ki kali kiba la shah pynjulor, katba ka khot ban don ki jingkular na ka bynta ka jingshngain jong ki nongniah kali bad ki nongwan jngohkai pyrthei na Assam.
Na ka liang pyrshah ka la buh jingkylli ruh halor ka jingsngap jar jong u myntri ka tnad jngohkai pyrthei bad ka leit ka wan jong ka Assam halor kane ka mat.
