Shillong, Nailar 20 : U Deputy Commissioner ka East Khasi Hills Abhilash Baranwal ha ka sngi Palei ula ong ba ki jing kam jong ka KSU ba ki runar ne riewshimkabu kila hijack ia ka rally thuk thuk ban pynjah burom ia ka seng, kam iahap satia bad ki sakhi satar bala ioh lum.
Haba kynthoh ia ki jingpynksan ka KSU, u Baranwal ula ong “Kano kano ka jingpyni nia ka dei kaba hap ban bishar pyrshah ia ka sakhi kiba don bad ngi. Ha kane ka jingjia, la kumno kumno ruh ha kane ka rally, kila don bun ki briew kiba rah ia ki dieng, ki narrod, ki nombor plate bala tap bad ba kah dur khmat”.
U ong ba ka jingiaid ki kam thombor ka kdew pyrshah ia ki jingkam ba dei ki jingleh jong ki briew ba nabar.
“Nalor kata, kam dei tang kawei ne ar tylli ki jingjia ba jia ha shilynter ka jingiaid rally, kila don bun tylli ki jingjia. Lada phi bishar ia kine kijingjia, Ngam tharai ba ki jingpynksai nia ki iahap bad ki sakhi” ula ong.
U Deputy Commissioner ula ong ba kane ka kam ka dang don hapdeng ka jingtohkit bad kan shong ha ka Iingkashari ban rai la ka dei ka jingiasylla lane kaba da thmu lypa.
“Ka dei ka kam ba hap tohkit bad khatduh ia ka ejahar lah dep ban ujor. La ka dei kaba thmu lypa ne ba don ki nongsylla, la ka dei ba don kiba kynshoit lane don ki riew bymman kiba pyrshang ban hijack ia ka rally ka dei kaei kaei kaban sa mih ha ka jingtohkit bad ka kam jong ka Iingkashari ban rai” ula ong.
Ula bynrap “Hynrei, ia mynta, namar kane ka jingjia ka jia tang hynnin ka sngi, ngi hap ban shong bishar ia kino kino ki jingpyni nia pyrshah ia ki sakhi ba don bad ngi bad ki sakhi ki don ia baroh ban iohi. Kila mih ha ki social media, ha ki lad pathai khubor baroh”.
“Ka shong ha ka rukom pyrkhat jong baroh la ka dei kaba da thmu lypa ne la ki dei ki dkhot jong ka seng lane don kiwei ki riew bymman kiba kwah ban shim kabu ia kane ka rally thuk thuk” ong u Baranwal.
